Knud Olsen | |
Statsborgarskap | Noreg |
Fødd | 31. desember 1802 Røros |
Død |
1. november 1879 (76 år) |
Yrke | politikar, stiger, rekneskapsførar |
Språk | norsk |
Far | Ole Detlevsen |
Knud Olsen (31. desember 1802–1. november 1879) var ein norsk overstiger og proviantskrivar frå Røros som møtte på seks storting i tida 1842 til 1858. Ole Detlevsen var far hans, og Svend Aschenberg svigerfaren.
Knud Olsen byrja arbeide for Røros koparverk i 1818. Den fyrste tida var han rekneskapsførar for bygningsavdelinga, og tok elles del i undervisninga ved den såkalla kadettskulen til verket. I tida 1822-25 hadde han stipend for å gå bergskulen i Falun. År 1825 rydda han opp i 20 års ugjort marskscheiderarbeid og laga kart over alle gruvene til Røros verk. Frå 1827 arbeidde han som overstiger, styrar av verket sine gruver i Folldal i 1829. Åra 1833-51 overstiger ved Røros verk. År 1839 reiste han og besøkte mange gruver i Sverige og Tyskland, og stod seinare føre fleire forbetringar i i gruvedrifta til verket. Mellom anna bygde verket, som det fyrste i Noreg, hestejarnbane i Kongens gruve og Muggruva, nye stollanlegg i Kongens og Storvarts-gruvene og bygde om vaskeanlegga. I 1851 vart Olsen proviantskrivar for verket, i tillegg var han perioden 1858-73 skoginspektør ved Røros og Fredriksgaves koparverk.
Frå 1838 til -45 var Olsen den fyrste ordføraren i Røros herad, og seinare medlem av heradsstyret i lang tid. Åra 1839-42 var han også forlikskommissær. I 1842 fekk han stifta Røros Sparebank og var leiar av banken til 1876. Han var formann i matrikkelkommisjonen for Røros og medlem i matrikkelkommisjonen for Strinda og Selbu. I 1851 var han medlem i ein kommisjon om Kongsberg sølvverk, også med i Skoglovskommisjonen av 1858.
Olsen representerte Søndre Trondhjems amt på Stortinget i 1842, 1845, 1848, 1854, 1857 og på omframtstortinget 1858. På alle desse tinga var han med i Næringskomite nr 1, som medlem i 1842 og sidan sekretær. Elles var han i 1857 medlem i komiteen om stortingsbygninga og 1857-58 i Lagtinget.