Harry Danielsen | |
Statsborgarskap | Noreg |
Fødd | 14. september 1936 |
Død | |
Yrke | politikar |
Språk | norsk |
Politisk parti | Høgre |
Harry Danielsen (14. september 1936–12. mai 2011) var ein norsk skulemann og politikar frå Rødøy i Nordland. Han representerte Nordland fylke og partiet Høgre på Stortinget i perioden 1981-85 og ei tid i 1985/86-sesjonen.
Danielsen var lærar og seinare skulestyrar i Steigen kommune frå 1958 til -66 og frå 1968 til -71. Etter eit år som distriktslogoped i Alstahaug kommune arbeidde han i ymse skulestillingar i Lurøy kommune frå 1972 til -78. Perioden 1978-87 var han tilsett logoped ved Pedagogisk-psykologisk distriktssenter for Nesna-regionen. I 1987 gjekk han tilbake til skulestova på Molag skole i Lurøy, slutta i 1998.
Ved stortingsvalet 1981 hadde Høgre stor framgang over heile landet og Danielsen rykte inn på Stortinget frå fjerdeplassen på Nordland Høgre si valliste. På Tinget var han medlem i Samferdslekomiteen. Stortingsperioden 1985-89 var Danielsen 1. vararepresentant for Høgre i Nordland, og møtte fast som representant 4.10.1985-9.5.1986 i staden for statsråd Petter Thomassen. Han var då medlem i Forbrukar- og administrasjonskomitéen. Sommaren 1987 melde Danielsen seg ut av Høgre.