Dravle er eit norsk tradisjonelt mjølkeprodukt, kjend frå heile landet.
Dravle er dei fleste stadene mjølk sprengd med surmjølk under koking, der ostemassen ligg i mysa.[1][2] Andre stader legg ein meir arbeid i dravlekokinga. Mjølka vert innkokt, dvs. at ein «sprenger» mjølka med løype eller kulturmjølk. Når mjølka har skilt seg, tek ein ut noko ostestoff, og lèt resten koka vidare i ein til fire timar. Deretter tilset ein ostestoffet att, og eventuelt litt fløyte. Egg, sukker og kanel er andre moglege ingrediensar.
Dravle kan etast frå ei vanleg suppeskål, både til kvardags og fest; varm eller kald. Han kan vera ein eigen rett og kan nyttast som dessert, til ostebord eller ein kan servera han til spekekjøt, vaflar eller lefser.[3][4]
Vossadravle er eit produkt laga av Tine SA, opphavleg ved Tine Meieriet Voss,[5] og etter at dette blei lagt ned i januar 2023[6] ved Tine Meieriet i Skjåk.[7] Ingrediensane i Vossadravle er mjølk, kulturmjølk, sukker og fløytemysost.