Peter Blusch (* 11. Juni 1942) is en ehmalger düütsch Footballspeler.
Peter Blusch wurr 1942 as Peter Bluskowicz in’ düütschen Oosten boren un keem bald nah Kriegsenn’ mit sien Familie in’t Siegerland. As Kind speel he in de Jöögd vun Sportfreunde Siegen, wo he vun den langjohrigen Jöögdtrainer Rudi Brückmann as völverspreken Talent opdeckt wurr. As 18-Johrig kreeg he 1960 glieks en Stammplatz in de 1. Mannschaft vun de Sportfreunde, mit de he 1961 bit 1963 in de Westdüütsch 2. Division un ansluutend een Saison in de Regionalliga West speel[1].
1964 is Blusch to Eintracht Frankfurt in de 1. Bundsliga wesselt. Dor hett he all tosommen 110 Spelen maakt. Sien dree totale Feldverwiesen alleen in de Saison 1966/67 sünd immer noch Bundsliga-Rekord. 1968 wessel he an den Rhien to’n 1. FC Köln, för de he 44 Mal speelt hett. As Düütsch Viezmeester gung he 1970 to’n 1. FC Kaiserslautern, för de he 20 Insatzen in de Bundsliga harr. In sien Loopbahn hett de Afwehr- un Middelfeldspeler all tosommen 10 Doren schaaten.
1965 befunn sück Peter Blusch sogor up den Sprung in de Düütsch Natschonalmannschap. An’ 10. März 1965 keem he in dat B-Länderspeel gegen Holland as rechter Verteidiger to’n Insatz. In dat glieker Speel hemm ok Franz Beckenbauer un Günter Netzer hör internatschonal Debüt geven.
Nah sien Bundsligatiet speel Blusch noch för Neuchâtel Xamax in de Swiez un weer Spelertrainer bi den FC Vaduz in Liechtensteen.
as Spelertrainer