Otto Sander (* 30. Juni 1941 in Hannober; † 12. September 2013 in Berlin[1]) weer en düütschen Schauspeler, Synchroonsnacker un Höörspeelspreker.
Sander is in Paane un Kassel opwossen. In Kassel hett he 1961 an’t Friedrichsgymnasium sien Abitur maakt. Dorna hett he bi de Bundsmarine sien Wehrdeenst afleist, den he as Fähnrich to See vun de Reserve beennen de. Oorsprünglich harr he dat Teel Speelbaas to warrn un hett dorüm en Studium in de Fäcker Theaterwetenschop, Germanistik, Literaturwetenschop, Kunsthistorie un Philosophie an de Ludwig-Maximilians-Universität München opnahmen. 1964 wessel he an de Otto-Falckenberg-Schule, woneem he Schauspeelünnericht nahmen hett. Man, he weer dat Johr dorop vun de School verwiest un hett sien Utbilln mit en externen Afslussprüfung toenn maakt.
Sien eersten Verdrag kreeg Sander an de Kamerspelen in Düsseldörp, woneem he 1965 anfüng. Dorna weer he an’t Theater vun de Stadt Heidelbarg un is denn 1968 vun Claus Peymann an de Fre’e Volksbühne Berlin beropen worrn. Later hett em Peter Stein an de Schaubühne an’t Hallesche Över halt, de 1970 grünnt weer. Dor hett he ünner annern mit Klaus Michael Grüber, Wilfried Minks un Luc Bondy tosamenarbeit. vun 1980 an harr he Gastrullen an verschedene Bühnen in Berlin. In de Johren 2000 un 2001 hett Sander bi de Soltborger Festspelen den Dood speelt in Hugo von Hofmannsthal sien Jedermann.
Blangen sien Arbeit as Schauspeler hett Sander ok as Speelbaas arbeit un stell sien Inszeneeren, de he deelwies mit annere Speelbasen as Wolf Redl un Peter Fitz maakt hett, ünner annern ok an de Schaubühne an’t Hallesche Över un an’t Schauspeelhuus Zürich. Na en Krebskrankheit[2] is Sander in’n Oktober 2007 wedder na’t Theater torüchkamen un hett to’n Bispeel in’t Renaissance-Theater in Berlin in Samuel Beckett sien Krapp’s Last Tape speelt.
Sien eerste Filmrull harr Sander 1964 in Roland Klick sien Kortfilm Ludwig. Dorna hett he in vele Film- un Feernsehprodukschonen mitspeelt, so as 1976 in Éric Rohmer sien Die Marquise von O. oder 1979 in Die Blechtrommel vun Volker Schlöndorff. To sien bekanntsten Filmrullen tellt de Engel Cassiel in Der Himmel über Berlin vun Wim Wenders oder ok de U-Boot-Kummandant Philipp Thomsen in Das Boot vun Wolfgang Petersen.
Wegen sien warme Stimm, de em den Binaam „The Voice“ (De Stimm) inbröcht hett, is Sander ok faken as Sprelker vun Feernsehdokumentatschonen, Höörspelen un Höörböker insett worrn un weer ok as Synchroonsnacker nafraagt (Ünner annern för Dustin Hoffman un Ian McKellen.
Sander weer mit de Schauspelersche Monika Hansen verheiraat un weer de Steefvadder vun Ben un Meret Becker. He harr twee Bröder un en Süster.
2004 hett he sik stark maakt as „Bottschopper“ för de Düütsche Sellschop to’n Redden vun Schippbröökige (DGzRS). In disse Positschoon, de jeed Johr wesselt, stünn he ehrenamtlich för Warf praat.[3]
Sander künn den Kreeft nich bikamen. He is an’n 12. September 2013 in Berlin doodbleven.[4]
Johr | Titel |
---|---|
1964 | Ludwig, Kortfilm |
1970 | Nicht fummeln, Liebling |
1974 | Einer von uns beiden |
1975 | Meine Sorgen möcht’ ich haben |
1975 | Lehmanns Erzählungen, Feernsehn |
1976 | Die Marquise von O… |
1979 | Die Blechtrommel |
1980 | Palermo oder Wolfsburg |
1981 | Kalt wie Eis |
1981 | Das Boot |
1981 | Der Mann im Pyjama |
1982 | Wer spinnt denn da, Herr Doktor? |
1984 | Der Mord mit der Schere |
1986 | Rosa Luxemburg |
1986 | Wahnfried |
1987 | Der Himmel über Berlin |
1988 | Z.B. … Otto Spalt |
1989 | Der Bruch |
1990 | Werner – Beinhart!, Stimm |
1990 | Zeit der Rache |
1993 | In weiter Ferne, so nah! |
1995 | Bauernschach, Feernsehn |
1996 | Truck Stop |
1996 | Kondom des Grauens |
1997 | Comedian Harmonists |
1998 | ¿Bin ich schön? |
1999 | Der Kuß des Vergessens, Feernsehn |
1999 | Männer sind wie Schokolade, Feernsehn |
1999 | Der Einstein des Sex |
2001 | Sass |
2003 | Werner – Gekotzt wird später!, Stimm |
2003 | Donau, Duna, Dunaj, Dunav, Dunarea |
2007 | Der kleine König Macius – Der Film, Stimm |
2007 | Das Herz ist ein dunkler Wald |
2008 | Krabat, Stimm |
2012 | Bis zum Horizont, dann links! |