Karl („Karlo“) Wien (* 10. September 1906 in Würzborg; † vermootlich 14. Juni 1937 an' Nanga Parbat) weer en düütsch Bargstieger.
Karl Wien, Söhn vun den Universitätsperfesser un Physiker Wilhelm Wien, de 1911 den Nobelpries för Physik kreeg, studeer nah dat Abitur 1924 an dat Wilhelmsgymnasium München[1] Geographie an de Ludwig-Maximilians-Universität in München un wurr sülvst Dozent.
Wien hett sien eerst Bargerfohren in den Alpen maakt, wo hüm tosommen mit Willo Welzenbach de Eerstbegahn vun de Noordwand vun den Großglockner gelung. Tüschen 1924 un 1928 weer he mehrmals Aktivenvörstand vun den Akadeemschen Alpenvereen München. Buterhalv vun Europa hett he mehrere Besöök nah Afrika un in de Himalaya-Region maakt. So hemm he un Erwin Schneider 1928 de Eerstbestiegen vun den Pik Lenin in' Pamir schafft, mit 7134 Metern de dormals hööchst besteegen Barg. 1931 weer he Liddmaat vun de Kangchendzönga-Expeditischon ünner de Leitung vun Paul Bauer. In' Rahmen vun de Sikkim-Expeditschoon 1936 gelung Wien tosommen mit Adolf Göttner de Eerstbestiegen vun den 6888 Meter hooch Siniolchu.
Een Johr later wurr Karl Wien dorto utsöcht, de Düütsch Nanga-Parbat-Expeditschoon 1937 up den „Schicksalsbarg vun de Düütschen“ antoführen. Dat weer de nee Versöök vun de Eerstbestiegen vun den Nanga Parbat, nahdem in' Rahmen vun de Düütsch Nanga-Parbat-Expeditschoon 1934 teihn Bargstieger – Alfred Drexel, Uli Wieland, Willo Welzenbach, Willy Merkl as ok söss Sherpas – to Dood keemen. In de Nacht van' 14. up den 15. Juni 1937 hemm Wien un sien Kameraden in dat Lager IV kampeert, as sück en gewaltige Ies- un Schneelawine vun de Séracs vun den Rakhiot-Gletscher lösen un de Bargstiegers verschütten dee. Söben Düütsche un negen Sherpas keemen bi dat Unglück to Dood, blots de Expeditschonsdokter Uli Luft hett in en deeper Lager överleevt. Disse Katastrophe gellt bit hüüd as dat gröttste Unglück up en Achtduusender. Nah dat Bekanntwurrn vun dit Unglück, hett Paul Bauer, de Baas vun de Düütsch Himalaya-Stiften, en Expeditschoon to dat Bargen vun de Lieken organiseert.