Karl Sack (* 9. Juni 1896 in Bosenheim, hüüd to Bad Kreuznach; † 9. April 1945 in dat KZ Flossenbürg) weer en düütsch Jurist un Wedderstandskämper tegen den Natschonalsozialismus.
Karl Sack studeer Jura ünner annern in Heidelbarg, wo he Liddmaat vun den Burschenschap Vineta wurr. 1927 weer he Liddmaat vun de Düütsch Volkspartei.[1] Nahdem den Natschonalsozialisten an de Macht keemen is he in den Bund Nationalsozialistischer Deutscher Juristen intreden.[1] Nah en Tätigkeit as Amtsrichter wessel Sack 1934 to de nee inricht Militärjustiz. Dor hett he Karriere makt un is bit to’n Richter an dat Riekskriegsgericht upstegen. In disse Funkschoon weer he mit dat Verfohren tegen den vun de Gestapo wegen Homosexualität beschuldigt Chef vun de Heeresleitung Werner von Fritsch befaat un kunn nahwiesen, dat de Anschuldigungen ahn Grundlaag weern. 1942 wurr Sack Chef vun de gesamt Heeresjustiz.
Während den Tweeten Weltkrieg keem Sack in Kuntakt to de Wedderstandskreise vun de Afwehr un vun de Wehrmacht. De Verswöörer vun den 20. Juli 1944, in deren Plääns he inweeht weer, harrn hüm, wenn de Anslag klappt harr, as Rieksjustizminister vörsehn. De Anslag hett denn nich klappt un Karl Sack wurr an’ 9. August 1944 verhaft un in de letzt Kriegsdaag dör en SS-Standgericht ünner den Vörseet vun Otto Thorbeck to’n Dood veroordeelt un henricht.
1984 wurr Karl Sack dör dat Anbringen vun en Bronzetafel in’t ehmalg Riekskriegsgericht in Berlin-Charlottenburg as Wedderstandskämper ehrt. Disse Ehrung weer aber bannig ümstreeden, wiel he en wietreichend Utleggen vun den Straftatbestand vun de Fahnenflucht beförwoorten dee.
In Bosenheim, en Vöroort vun Bad Kreuznach, hebbt se en Straat nah hüm nömmt.