Johann Caspar Herterich (ok Johann Kaspar Herterich; * 3. April 1843 in Ansbach; † 26. Oktober 1905 in München) weer en düütsch Historien- un Genremaler un inflootriek Lehrer an de Münchner Königlichen Kunstakademie.[1]
Johann Caspar Herterich weer de Söhn vun den Bildhauer un Restaurator Franz Herterich (1798–1876) un de öllere Bröer vun den Maler Ludwig von Herterich. Nahdem he nah München trucken weer, wurr he en Schöler vun Philipp Foltz un Carl Theodor von Piloty. Af 1882 weer he Hülpslehrer un siet 1884, as Nahfolger vun Gyula Benczúr, Perfesser an de Königliche Kunstakademie in München in de Natuurklass.[2]
To sien Schöler hebbt ünner annern tellt Benno Elkan, Iosif Iser, Bruno Paul Hetze, Alexander Eckener, Max Slevogt, Theodor Doebner, August Wilde, Max Hein-Neufeldt, Leonid Ossipowitsch Pasternak un Josef Wittmann. Af un to wurrn Arbeiten vun den Künstler in' Auktschoonshannel anboden.[3]