John Peter "Jack" Thiessen (* 14. April[1] 1931 in Manitoba; † 9. Oktober 2022) weer en kanaadschen Spraakwetenschopper, Germanist, Kulturaktivist un Schriever.
Thiessen is 1931 in Manitoba boren un in en Familie von Russlandmennisten mit Plautdietsch as Moderspraak in de Neegd von Winnipeg opwussen. Siene Öllern weren ut Chortiz inwannert. Hoochdüütsch un Engelsch hett he later tolehrt. Thiessen hett an dat Mennonite Collegiate Institute un an de Universität von Manitoba studeert un hett 1961 an de Universität Marburg siene Doktorarbeid över Plautdietsch schreven un ehr twee Johr later as Studien zum Wortschatz der kanadischen Mennoniten in de Reeg Deutsche Dialektgeographie: Untersuchungen zum Deutschen Sprachatlas rutbröcht. In de Arbeid ünnersöcht he den plautdietschen Woordschatz in’n Tosamenhang mit prüüßsche Dialekten un de Kulturgeschicht von de Mennisten. Blangen de spraakwetenschopliche Arbeid hett he ok en Barg Kortgeschichten un Vertellsels op Plautdietsch schreven. 1961 is he Maat von dat Manitoba Arts Council worrn un weer von 1971 bet 1976 dor ok de Vörsitter. In de Johren 1960 un 1970 hett he as Perfesser un Dekan dat German Department an de Universität von Manitoba un de Universität von Winnipeg mit opboot. 1977 is sien plautdietsch Wöörbook (Mennonite Low-German Dictionary) rutkamen. In de Johren 1980 un 1990 hett he as Översetter arbeidt un harr en Steed as Gastperfesser an de Universität Kiel un an de Universität Jena för Engelsche Spraak un Kanaadsche Literatur. 1999 is in Kanada sien tweet plautdietsch Wöörbook (Mennonitisch-Plautdeutsches Wörterbuch / Mennonite Low German Dictionary) rutkamen, dat 2003 von dat Max-Kade-Institut (Universität von Wisconsin-Madison) in överarbeidt Form noch wedder neet rutgeven worrn is. Thiessen leevt mit siene Fro Audrey in New Bothwell (Manitoba, Kanada).