Horst Pillau (* 21. Juli 1932 in Wien; † 7. Juni 2021 in Berlin[1]) weer en öösterriekschen Dramatiker un Schriever vun Theaterstücken, Höörspelen un Dreihböker.
Pillau is 1932 in Wien boren un denn in Berlin opwussen. Siet 1959 dee he as fre’en Schriever arbeiden. Glieks good ankamen dee ünner annern dat Bühnenstück Das Fenster zum Flur, dat he tohoop mit Curth Flatow schreven hett.
He hett ok Stücken för dat Ohnsorg-Theater schreven un ok Dreihböker för dat Feernsehn maakt, to’n Bispeel för Familienbande, Ein Mann macht klar Schiff, Die Wilsheimer un Salto Mortale. Ok vun Theodor Fontane siene Wanderungen durch die Mark Brandenburg hett he en Dreihbook vun maakt. För de Feernsehshow Dalli Dalli hett Pillau korte Theaterstücken schreven, bi de de Kandidaten Fehlers rutfinnen schullen, de dor in versteken weren.