Hinrich (* um 1174; † 11. Juni 1216) weer de tweete Kaiser vun dat Latiensche Kaiserriek vun Konstantinopel.
He weer de jüngere Söhn vun den Grafen Balduin V. vun Hennegau (later Graaf Balduin VIII. vun Flannern) un vun Mararethe, Philipp vun Elsass siene Süster.
Üm 1201 rüm hett he sik an den Veerten Krüüztog anslaten. Bi dat Belagern vun Konstantinopel in dat Johr 1204 hett he sik goot slahn un dat duer nich lang, dor weer he en vun de Bekanntesten mank de Försten vun dat nee Latiensche Kaiserriek. Sien öllern Broder weer Kaiser Balduin I. As de in de Slacht vun Adrianopel in'n April 1205 gefangen nahmen wurr, dor hefft se Hinrich to'n Regenten an siene Steed wählt. Later, as denn bekannt wurrn is, dat Balduin doot weer, is he sien Nafolger wurrn. An'n 20. August 1205 is he to'n König krönt wurrn.
Hinrich weer en wisen Herrscher. Tomeist harr he mit Striet un Krieg gegen Kaloja, den Zar vun Bulgarien un gegen sien greekschen Gegenspeler, Kaiser Theodor I. vun Byzanz to doon. Theodor regeer in Nicäa. Hinrich hett meist de Böverhand harrt. So, as dat utsütt, is he nich bange ween, man ok nich brutal. He weer woll tolerant, man nich swack. De Kaiser is an'n 11. Juni 1216 storven. Dat warrt seggt, siene Fro Agnes, de ut Grekenland stammen dö, harr em mit Gift an'e Siet bröcht.