Hans Ehrke (* 10. April 1898 in Demmin; † 29. Oktober 1975 in Kiel) weer en plattdüütschen un hoochdüütschen Schriever.
Ehrke is 1898 as Söhn vun en Tollbeamten in Demmin boren. He güng in Schönbarg na de Volksschool un vun 1905 af an in Kiel op Realschool. 1913 bet 1921 weer he op de Präparandenanstalt un dat Lehrerseminar in Kiel un arbeidt denn in Kiel un Rendsborg as Lehrer. 1938 warrt he in Kiel Rekter un blifft dor bet he 1961 pensioneert warrt.
Ehrke hett vele Priesen för siene Warken kregen: 1924 Pries in’n Eenakter-Wettbewarf vun de nedderdüütsche Bühn Flensborg för dat Stück Dat Pastür. 1924 den 1. Pries in dat Lustspeel-Priesutschrieven vun de nedderdüütsche Bühn Hamborg för dat Stück Narrenspeegel. 1931 den Stavenhagen-Pries vun’n Nedderdüütschen Bühnenbund un de NORAG för nedderdüütsche Dramatik. 1937 den Sleswig-Holsteenschen Literaturpries för dat Gesamtwark. 1938 den John-Brinckman-Pries vun’n Go Mekelnborg. 1942 den Mekelnborgschen Schriftdomspries vun’n Go Mekelnborg för dat Gesamtwark. 1959 den Fritz-Stavenhagen-Pries un 1968 den Klaus-Groth-Pries.