Francis Walker (* 31. Juli 1809 in Southgate, London; † 5. Oktober 1874 in Wanstead) weer en britisch Entomoloog un Lepidopteroloog.
Walker stamm ut en Familie, de up Geld nich achten muss, un is in de Swiez upwussen. Dor hett he sück all fröh för dat Sammeln vun Bottervagels begeistert. He hett van 1837 bit 1863 för dat British Museum (dat latere Natural History Museum) Insekten sammelt un hett deren Sammlung katalogiseert (mit Utnahm vun Kävers). He hett över 300 wetenschapliche Arbeiten herutbrocht un vun hüm sünd tallriek noch hüüd gellend Eerstbeschrieven, aber ok völ Düppelbenennungen, wat hüm later umstreeden maakt hett. En Grootdeel vun sien Typmaterial gifft dat noch un befinnd sück to’n Bispeel in dat Natural History Museum. Walker hett up den Familiensitt Amos Grove wahnt.
He hett nich blots in Grootbritannien un Irland sammelt, sonnern ok in Frankriek, Italien, Düütschland un Lappland.
