Arthur Evelyn St. John Waugh (* 28. Oktober 1903 in London; † 10. April 1966 in Taunton) weer en engelschen Schriever.
Evelyn Waugh sien Vadder weer Rutgever. He süms studeer in Oxford up Historiker. He schreev in jummers leifige Spraak Romaans, wo dat üm Tietkritik un to'n Deel ok üm Satire bi güng.
Waugh is as jungen Schriever fix goot upnahmen wurrn. He höör to de junge Upper Class in de 1920er Johren to, de dat an nix fehlen dö. Besunnern Spaaß harr he an de Bildkunst .Sien eerstet Book güng över dat Leven vun Dante Gabriel Rosetti un to siene Novell "Love Among the Ruins" hett he süms de Biller tekent. Siene eerste Eh is ut'neen broken. Wat dat för em bedüden dö, hett he 1934 in "A Handful of Dust" beschreven. Laterhen is he to de Röömsch-Kathoolsche Kark övergahn. Jummers mehr stünn he alleen mit sik in'e Eck. En vun siene roren Frünnen weer Graham Greene. Dat warrt seggt, he is wat afsunnerlich wurrn un wat de Politik angeiht, stünn he up de Siet vun de Reaktschoon. He wüss nix gegen de Politik vun Franco un Benito Mussolini intowennen. De sozialen Reformen in England na den Tweeten Weltkrieg lehn he just so af, as dat Tweete Vatikaansche Konzil un sien Reformen binnen de Kathoolsche Kark an'n Anfang vun de 1960er Johren.
In siene Böker weet he afsunnerlich goot Dialogen to schrieven (Dat gifft wecke över twee Sieden hen). Bavenhen hett he dat, wat en Swarten Humor nömmt: In "Black Mischief" fritt de Anti-Held ut Versehn sien Deern up un "The Loved One" speelt in de Welt vun US-amerikaansche Bestatters. En ganze Reeg vun Schrievers, as Muriel Spark un V.S. Naipaul, hefft sik wat bi em afkeken. Naipul wull as jungen Mann just so schrieven, as Waugh.
Stephen Fry hett den Film "Bright young things" ut Waugh sien Book "Vile bodies" maakt.
De meisten Lüde lehren Waugh kennen, as vun sien Romaan "Brideshead Revisited" för en Miniserie vun dat britsche TV to'n Film maakt wurrn is. Dor weern Jeremy Irons unLaurence Olivier mit bi un över de ganze Welt hen hefft Lüde sik dat 1982 ankeken. Ut "A Handful of Dust" is en Film mit Sir Alec Guiness wurrn. He geev oorntlich wat up Waugh. Al fröher hett dat en Film över "The Loved One" geven. Dor weern Rod Steiger un John Gielgud mit bi. Speelbaas weer Tony Richardson. Waugh sien öllern Broder Alec Waugh is ok Schriever ween. Sien Söhn Auberon Waugh (1939-2001) weer en beetschen Kolumnisten.
Hier staht de Böker vun Waugh to lesen, so as se up Engelsch un Düütsch rutkamen sünd. Up Platt gifft dat nix vun em to lesen.
Hier staht de Filmen so to lesen, as de up Engelsch oder up Düütsch to sehn weern.