Charles Eugène Vicomte de Foucauld („Broder Karl vun Jesus“, * 15. September 1858 in Straßborg; † 1. Dezember 1916 in Algerien) weer Offzier, Mönk bi de Trappisten un kathoolschen Preester.
He keem ut en rieke Familie ut den Adel. Siene Öllern sünd fröh storven. Mit siene Suster Marie is he vun'n Grootvadder uptagen wurrn. In sien Schooltiet up'n Gymnasium hett he sien Gloven verloren un wenn sik vun de Kark af. Later is he Offzier wurrn. Bekannt wurrn is he vunwegen siene gefährliche Reise dör Marokko (1883-84). De möök em beröhmt. Vunwegen den Kontakt mit den Islam fraag he nu wedder na Gott. As he 28 Johr oolt weer, wenn he sik wedder na den christlichen Gloven hen. He hett dor later över schreven: „In den Momang, as ik begrepen hebb, dat dat Gott gifft, dor weer mi kloor: Ik konn nu nix anners mehr maken, as för em to leven“.
He is denn 1890 Liddmaat in den Oorden vun de Trappisten wurrn un bleev dor bit 1897. In'n Februar is he dor uttreden. Dat Leven bi de Trappisten weer em nich streng noog. Vun 1897 bit 1900 leev he ganz för sik bi de Klarissen in Nazaret. 1901 is he denn Preester wurrn.
He güng na de Sahara in Algerien. Toeerst leev he dor in de Oase Beni Abbès un later in Tamanrasset un in de Hoggar-Bargen. Dor leev he midden mank de Moslems un wünsch sik, he müch „de Broder vun all Minschen“ ween un en Bild vun Jesus Christus siene Leev mank de lüttjen Lüde, mank de Armen un de, de gor keen Christen sünd. An'n 1. Dezember 1916 is he bi en Roovöverfall dootschaten wurrn.