Hugo Alvar Henrik Aalto (* 3. Februar 1898 in Kuortane, Finnland; † 11. Mai 1976 in Helsinki, Finnland), weer en finnschen Architekt un Designer.
Aalto weer bekannt för siene Konzeptschonen in't Rebeet vun de organische Architektuur. En relativ bekannt Designstück vun Aalto is de Aalto-Vaas.
Aalto studeer vun 1916 bet 1921 Architektuur an't Polytechnikum in Helsinki. Sien Lehrmeester weer Armas Lindgren. 1923 apen Aalto na en utdehnte Studienreis dör Europa en egen Architektuurkontoor in Jyväskylä. 1927 güng he mit sien Kontoor na Turku. 1928 wörr he Liddmaat vun'n Congrès Internationaux d'Architecture Moderne (CIAM).
1933 güng Aalto na Helsinki. 1935 grünn he tosamen mit siene Fro Aino de Möbelfirma Artek. Mit disse Firma patenteer he denn ok den eersten freedregen Stohlrahmen ut Holt. Vun 1940 an weer Aalto Perfesser för Architektuur an't Massachusetts Institute of Technology in Cambridge. Alltohoop möök Aalto so wat 200 Projekten, vun de de Half ok utföhrt wörrn.
Nadem siene Fro Aino 1949 dood bleev, heirad he 1952 Elissa Mäkiniemi.
Alvar Aalto is op den Karkhoff Läntinen Hautausmaa in Helsinki bisett.