Dat 15. Johrhunnert fangt an up’n 1. Januar 1401 un geiht to Enn an’n 31. Dezember 1500. An't Enn vun dat Johrhunnert geiht ok dat Middelöller to Enn un de fröhe Nutiet fangt an.
In den Westen un Noorden vun Europa fangt in de lesten Johren vun dat 15. Johrhunnert in Kunst un Kultur de Epoch vun de Renaissance an. In Italien weer de al 200 Jöhren vördem begäng. Mit dat Upkamen vun de Renaissance geiht dat eerst mol mit de Gotik nich mehr fudder. Allerwegens warrt dat as en groden Bröök för de europääsche Kultur ankeken, dat de Osmanen in dat Johr 1453 de ole Hööftstadt vun Byzanz, Konstantinopel innahmen hefft.
De Humanismus kümmt allerwegens up. De Lüde, de wat weten wüllt, de wennt sik torüch nah de Borns ut de Antike. Up düsse Aart hangt de Humanismus mit de Renaissance tosamen. Een vun de gröttsten Gelehrten vun den Humanismus is Erasmus vun Rotterdam. De Reformation steiht an’t Enn vun düt Johrhunnert al vor de Döör: Martin Luther warrt 1483 baren, Huldrych Zwingli kümmt 1484 to’e Welt.