Jan Nijen Twilhaar (Heldern, 1955) is een Oaveriesselse taalkundige die hum ienerzieds toeleg op dovenstudies, aanderzieds op 't Nedersaksisch en daorbinnen op 't Sallaands en Twèents.

An de Universiteit Utrecht studeerde e Nederlaandse taal- en letterkunde en promoveerde e in 1990 op Generatieve fonologie en de studie van Oostnederlandse dialecten. Hij warkt as heufddocent bij 't Instituut voor Gebaren, Taal & Dovenstudies van de Hogeschool Utrecht. Wieder is e daor onderzuker binnen 't lectoraat Dovenstudies.

Meermaals hef e eschreven aover de taal van zien plaatse van herkomst Heldern, die zowal Sallaandse as Twèentse kenmarken hef. Hij kan hum der grammietig aover maken as de dichteres Johanna van Buren, die uut 't Sallaandse Heldern kwaamp, dalezet wördt as Twèentse dichteres.

In 't Handboek Nedersaksische Taal- en Letterkunde (2008) naamp e 't heufdstok aover Oost-Aoveriessel veur zien reken. Redactioneel wark döt e veur de tiedschriften Nederlandse Taalkunde en Taal en Tongval. Van 't Oldsaksische epos de Heliand maakte hij zowal een Sallaandse as een Nederlaandse aoverzetting. Aspecten van de Heliandvertalerije beschrif e in 't artikel 'Taal en cultuur in vertaling: de Heliand', in Jaorboek Nedersaksisch 2 (2021).

Schrieverije

• Sallands, Twents en Achterhoeks (2003)
• Achternamen in Nederland en Vlaanderen (2006)
• Concise Lexicon for Sign Linguistics (2016, mit Beppie van den Bogaerde)
• Nedersaksisch in een notendop. Inleiding in de Nedersaksische taal en literatuur (2019, mit Henk Bloemhoff, Philomène Bloemhoff-de Bruijn, Henk Nijkeuter en Harrie Scholtmeijer)
• Heliand. Sallaandse vertaling (2022)
• Heliand in het Nederlands (2023)

Bronnen

• Henk Bloemhoff, Jurjen van der Kooi, Hermann Niebaum en Siemon Reker (red.) (2008), Handboek Nedersaksische Taal- en Letterkunde, Assen: Van Gorcum
• Henk Bloemhoff, Philomène Bloemhoff-de Bruijn, Jan Nijen Twilhaar, Henk Nijkeuter en Harrie Scholtmeijer (2019), Nedersaksisch in een notendop. Inleiding in de Nedersaksische taal en literatuur, Assen: Koninklijke Van Gorcum

Uutgaonde verwiezings

• Jan Nijen Twilhaar op de Digitale Bibliotheek voor de Nederlandse Letteren

Dit stok is eschreven in 't Zuudwest-Drèents.