Bart Veenstra (Gasselt, 4 meert 1921 - Gasselternijveen, 15 oktober 2005), schrieversname van Lambertus Henderikus Hadderingh, was een Drèentstalige schriever.
Veenstra, geboren as Lambertus Henderikus Hadderingh, gebruukte veur de schrieverije de achtername van zien vrouwe, Martha Hadderingh-Veenstra. Hij was een zeune van tummerman en annemer Hendrik Hadderingh en Jentje Duker.[1] Nao 't vurtraken van zien va gunk hij veureerst wieder mit die zien bedrief. Vanof 1956 begunde hij mit de schrieverije. Hij publiceerde in veule genres, waoronder tenielstokken, romans, detectives en kienderboeken. Samen mit onder aandern Jan Kroezenga schreef e aover de geschiedenis van Gasselte.
Mit zien zeune, drs. Henk Hadderingh, schreef e in 1979 't Drents Woordenboek, waorvan in 1988 de vierde drok uutkwaamp. Mit zien vrouwe vörmde hij vanof 1966 de redactie van 't eerste Drèentstalige tiedschrift, Oeze Volk. In 1976 kreeg 't blad de Culturele pries van Drenthe, een pries die Veenstra zölf in 1986 kreeg.
Veenstra had stokkies in de regionaole kraanten staon. In de Drentse en Asser Courant en in 't Nieuwsblad van het Noorden had e de column Drenthe in dizze daogen. Hij warkte mit an verscheiden pergrammes veur de regionaole umroep.
In heur huus op Gasselternijveen, de villa Adams, runden Veenstra en de vrouwe 't scheepvaortmuseum van Gasselternijveen.[2][3]
In 2003 verscheen de dvd "Bart Veenstra: een vrije vogel" in de riege "Schrieverspetret" van de Stichting Drentse Taol. Dit petret wördden deur Albert Haar emeuken.
![]() |
Dit artikel is eschreven in 't Zuudwest-Drèents. |