ZE
|
Sta pàgina a l'é scrîta in zenéize |
I Laghi do Gorzente (Lago Brùn, Lago Lóngo, e Lago da Badann-a) son trei baçin artifiçiæ scituæ inte l'entrotæra zeneize, a-o confin fra o territöio comunâ de Campomon e o Piemonte. Piggen o nomme da-o Gorzente, o córso d'ægua che sciòrte a valle, che confluindo inta Piota, poi in te l'Orba, a Bòrmida e o Tanaro o se riversa into Pò.
Complescivamente gh'han unna capaçitæ de 12.000.000 de metri cübbi d'ægua. Realizzæ pe-o rifornimento idrico da çittæ de Zena, son döviæ anche pe scòpi idroelettrichi: a corrente a vegne ottegnüa da unna centrale ch'a se tröva inta frasion de Gallaneo (Campomon). Finn a-i anni '80 do Növeçento i laghi ean anche colleghæ a Gallaneo da unna teleferica (oua smantellä). Inta fauna ittica de questi laghi se segnala o scaggion, a tròta e a carpa. O paesaggio çircostante i laghi o l' è notevolmente cangiòu dòppo a costrusion de dighe anche da-o pónto de vista da vegetazion, essendo stæto effetuòu notevoli rimboschimenti de conifere pe prevegnî l'interramento di laghi.
O Lago Brùn o se tröva a 646 metri in sce o livello do mä, a valle di atri doî invaxi. O l' è stæto o primmo di trei laghi a esse realizzòu, tra o 1880 e o 1883. Inti anni succescivi l' è stæto aumentòu a sö capiensa arsando a diga. Pòco a Ovest da diga prinçipä se tröva unna diga segondaia ciü piccinn-a, sormontä da-e opere de scàrego de superfiçie. Dôe gallerie convòglien inte questo lago l'ægua de diversci riæ esterni a-o sö baçin imbrifero.
Appenn-a impîo o Lago Brùn, inte l' autünno 1883 s'è ascistîo a di notevoli trasüamenti inta diga, che han fæto temme pe a sö tegnüa. S'è deciso anche pe questo motivo de realizzä un atro lago: o Lóngo, scituòu sübito a monte do Brùn, ch'o l'ha avüo donca a l'iniçio anche unna funsion de següessa, diminuindo l'afflüsso d'ægua into baçin a valle. O Lago Lóngo o se tröva a 684 metri s.l.m. Immissaio prinçipä de questo lago a l'è a Gæa do Lischeo.
Realizzòu fra o 1906 e o 1912, o Lago da Badann-a o l'è quello ch'o se tröva a unna quota ciü erta (717 m s.l.m.). O l'è scituòu completamente in territoio piemonteize. Attualmente o baçin de questo lago o se presenta vöo; no se sa ancun quande vegniä realizzòu i travaggi neçessaî a-a diga pe esse missa in següessa.
Diversci chilometri a valle da diga do Lago Brùn, lóngo o corso do Gorzente, se tröva atri doî laghi, diti da Lavagninn-a, che son stæti costruî dòppo e proteste che s'ea avüo inta valle de l'Orba. In seguito a-a realizzasion di Laghi do Gorzente e comünitæ da zòna a valle s'ean sentîe, defæti, privæ de risorse idriche. A Societæ Anonima De Ferrari-Galliera, che a l'aveiva a gestion di laghi do Gorzente, a l'ha donca realizzòu i doî laghi da Lavagninn-a a titolo de compensaçion. Attualmente o primmo de questi o l'è squæxi do tütto interròu da-i sedimenti portæ da-o Gorzente, mentre quello ciü a valle o l'alimenta un acquedotto e o serve a scòpi idroelettrichi ascì.