Dit artikel is gesjreve (of begós) in 't Heëlesj. Laes hie wie v'r mit de versjillende saorte Limburgs ómgaon.
Walchere is 't westelige deel va Zieëlank. 't Geet um e vuurmalig eilank, waat hüts g'n vuëtzètting is va Zuud-Bevelank i g'n ouw delta va g'n revier de Sjelde (egelig de Wester- en Oeëstersjelde). 't Gebeed telt óngeveër 115.000 lüj óp 'n óppervlakde van 216 veerkante kilometer. Doamit is Walcheren mit 526 inw/km² de dichbevolkste sjtrieëk va Zieëlank. Óp Walcheren ligke de groeëtste sjteë va g'n provins, wie Vlissingen en Middelburg. Anger klinger sjteë en dörper zint Arnemuiden, Veere, Oost-Souburg, Ritthem, Oostkapelle en Westkapelle. Domburg, Zoutelande en Vrouwenpolder zint bekinde badplaatsje aa g'n Noardzieë. Joarligs trek 't eilank vöal toeriste, die dök oet 't Belsj en Dütsjlank kómme. Veere en Middelburg weëde óch good bezóch vaweëge dön sjoeën ouw kerne.
De mieëtste lüj kalle nag 't lokaal Zieëws, of ze beheesje 't döks good. Dat geet vöaral óp in de kling dörper óp 't plattelank. In 'tzelfde gebeed zint de mieëtste lüj óch gereformeerd-protestants. de groeëter sjteë doateëge, wie Vlissingen, zint de lüj minder geleuvig. 't Zieëws, dat hei Burgerzieëws geneumd weëd, is angesj es de umringkende dialekte.
Óp 't sjiereilank woeëd d'r Sjlaag um Walchere oetgevochte. Doel woar neet de óntzettig van 't sjiereilank, meh 't veroavere va ge ganse Sjelde-estuarium, inclusief de wichtige Sjloehave. De Dütsje soldate boane fel teëgesjtank. De geallieerde tróppe besjlote doaróp d'r Dütsje bezetter te teëge te wirke durch de dieke bei Westkapelle te bombardere. I Weskapel vónge 180 lüj d'r doeëd. Anger plaatsj wie Vlissingen woeëde óntruumd. Oetintelig vónge óngeveër 1.600 lüj d'r doeëd durch de gevolge va de inundatie en 't kreegsgeweld. 't Ganse lanksjap woar verpes durch 't zaot van 't zieëwater. In fibberwaar 1953 woeëd Walchere nag eemoal getróffe durch 'n uëversjtreuming, meh neet zoeë had es in 1944.