Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.
De stumloeazen alveolaire laterale fricatief of stumloeazen alveolaire laterale glitsjklank is 'ne mitklinker dae in sómmige gespraoke tale veurkump. 't Symboeal det bie 't Internationaal Fonetisch Alfabet gebroek wuuertj is [ɬ].
Kènmirke
Kènmirke vanne stumloeazen alveolaire laterale fricatief zeen:
- De meneer van oetspraok is fricatief, det mèntj det ze wuuertj gemaak dore lóchstroum door e smaal kenaal oppe oetspraokplaats te paerse, wodoor turbulens óntsteit;
- De oetspraokplaats is alveolair, det inhèltj det t'r wuuertj oetgespraoke mit of d'n tóngspits of 't tóngblaad taenge d'n tandjwal (apicaal taenge laminaal);
- De artikulaasje is stumloeas, waat mèntj det ze wuuertj gemaak zónger trilling vanne stumbenj. In sómmige spraoke waere de stumbenj pezetig aopgehaje, dewiel ze in anger spraoke slap zeen, zodet ze de stumhöbbendjheid van aangrenzendje klenk kan euvernumme;
- Hae is 'nen orale mitklinker, waat mèntj det de lóch allein dore móndj eweg kan kómme;
- Hee is 'ne laterale mitklinker, waat inhèltj det ze wuuertj gemaak dore lóchstroum langs de ziejkantje vanne tóng te leien inplaats euvere midde;
- 't Lóchstroummechanisme is pulmonisch, det mèntj det de klank wuuertj gemaak door lóch die allein dore lónge en 't middereef wuuertj geduujdj, wie bieje meiste klenk.
Limbörgs
De stumloeazen alveolaire laterale fricatief is in 't Limbörgs 'n zeldjzaam variaasje oppe alveolaire lateralen approximant. Hae kump den allein veur in stumloeaze ómgaeving mit e neutraal toeanverloup, 'ne stoeattoean en 'ne lange klinker mit sleiptoean (dus noeatj wen de sleiptoean oppe korte klinker de sonorant verlingk) wen de spraeker allein specefiek de <l> waor alveolair oetsprèk.