Dit artikel is gesjreve (of begós) in 't Valkebergs. Laes hie wie v'r mit de versjillende saorte Limburgs ómgaon.
Sint-Joost-ten-Node (Frans: Saint-Josse-ten-Noode) ies 'n gemeinte in 't Brussels Hoofsjtaejelik Gewes, mèt 23.536 inweunersj (1 januari 2006). De gemeinte haet 'n oppervlak van 1,14 km² en ies daomèt de kleinste gemeinte van 't gewes en van gans Belsj. Ouch ies 't de diechsbevolkde gemeinte van Belsj, mèt 20.646 inw./km². Sint-Joost-ten-Node haet 'n tamelik groat aantal inweunersj van boetelandse aafkóms (33,27% boetelendersj, 2004). In 2000 waor 't de ermste gemeinte van Belsj (brón: NIS).
Sint-Joost-ten-Node liek tösje de binnesjtad van Brussel (ten zuje) en Schaarbeek (ten noorde). De sjtasie Brussel-Noord liek gedeiltelik op 't gróndgebeed van de gemeinte. Dao-umheen liegke kentoargeboewe en de erm sjtationsbuurt. 't Rogierplein haet väöl luxe hotels en winkelcentra.
De neobarokke Sint-Joostkèrk dateert oet 1865. 't Museum Charlier haet 'n collectie beeldende kuns. In de veurmalige botanische tuin (Kruidtuin of La Botanique) ies 't cultureel centrum van de Franse gemeinsjap gevestig.