Dit artikel is gesjreve (of begós) in 't Norbiks. Laes hie wie v'r mit de versjillende saorte Limburgs ómgaon.
Lotharinge, 't Midderiek of Midde-Francië (Latien: Francia Media of regnum quondam Hlotharii[1]) waor e deel van 't Karolingische riek dat an Lotharius I (†855) veel nao d'r doeëd van z'ne vader Lodewijk de Vrome († 840). De rieksdeling vón ze besjlaag bie 't Verdraag van Verdun (843). Lotharius waoërt teves keizer över 't gaanse Karolingische riek.
Lotharinge omvatte ruw eweg de vólgende gebiede (van allewiel):
De tale die in Lotharinge gekald waoërte waore Frankisch, Aodfraans, Occitaans, Arpitaans, Aodhoeëgduutsj, Aodsaksisch, Aoddfries.De religies die aa gehange waoërte waore 't Christendom en Germaans heidendom.
Bie 't överlijde van Lotharius in 855 waoërt mèt 't Verdraag van Prüm Lotharinge nao 't Salische gewoeënderech verdeeld oonder z'n zone.
Karel sjtórf in 863 zoonder naozate, oeënao zie gebied waoërt verdeeld tösje z'n breurs Lotharius II en Lodewijk II. Naodat Lotharius II in 869 sjtórf, waoërte z'n bezittinge bie 't Verdraag va Èèsde (870) verdeeld tösje z'n noonke, Lodewijk d'r Duutsjer van Oost-Francië en Karel d'r Kale van West-Francië. Hiemèt kieëm 'n èng an 't Koninkriek Lotharinge en waoërt d'r basis gelach vör 't Fraankriek en Duutsjlaand van allewiel.
Lodewijk II sjtórf in 876 zoonder wèttige naozate, z'n bezittinge gónge nao Karloman van Oost-Francië, d'r zoon van Lodewijk d'r Duutsjer. Dör 't Verdraag van Ribemont (880) kieëm vervólges gaans Lotharinge bie Oost-Francië es 't Hertogdom Lotharinge.