Dit artikel is gesjreve (of begós) in 't Kinders. Laes hie wie v'r mit de versjillende saorte Limburgs ómgaon.

'ne Driehook is 'n maetkóndige feguur die ontstuit deur drie punte die neet op ein rechte lien ligke mit ein te verbènje. De verbènjende lien vörme de ziej van de driehook.

Indeiling

Der zeen versjillige menere om drieheuk in te deile:

Indeiling op basis van de heuk

• sjerpe driehook: alle heuk zeen kleiner dén 90 graode.
• rechthokige driehook: ein van de heuk is 90 graode.
• stömpe driehook: ein van de heuk is groeter dén 90 graode.

Indeiling op basis van de ziej

• geliekziejige driehook: alle ziej zeen aeve lank. De drie heuk zeen ouch aan ein geliek, namelik 60°.
• geliekbeinige driehook: twie ziej zeen aeve lank, de anger is körter of langer. De twie heuk die aan de dörde ziej grenze zeen aan ein geliek.
• ongeliekziejige driehook: alle ziej versjille in lengde.

Eigesjappe

• 't oppervlak van 'ne driehook is geliek aan 't hauve produk van de lengde van ein ziej en de lengde van de loedlien vanaaf het tegeneuver gelaege hookpunt nao die ziej, of ouch:

oppervlak = basis × huugde / 2

• de sóm van de heuk van 'ne driehook is altied 180 graode.