- Dit artikel is gesjreve in 't Norbiks. Ómdat 't plaatsgebónge is, maogs doe 't ómzètte nao 't Oos-Voeres, es te dit dialek sjpriks.
Baerg is 'n buurtsjap va S'n Maeëte, dat tussje d'r dörpskern, de Knap en S'n Pieëter liegkt. Baerg liegkt neet op 'n huuëgde mae in 't Voordal.
De cultuur
Begin 17e ieëw waor d'r 'n kesjtieël, 'n lieën van 't Graafsjap Dalhem, mèt ègenaere oet o.m. de gesjlachte van Elven, van Buren. Väör 1679 gong 't över an de hieëre van Maer, die ooch Hoeëg Haere waore va S'n Maeëte. 't Kesjtieël è g'ne Baerg sjiengt doe in verval te zieë gerakd. Bie dit kesjtieël hoeërt 'n mäöle. Dis waoërt ca. 1675 kaopermäöle (ègenaers achtereenvolges Rulands, Elias, Gillis, Kevers), in 1770 papiermäöle (ègenaers achtereenvolges Kevers, Haagen). In 1820 waor dis nog in wèrking. Van dit kesjtieël-mäölecomplex zeunt de vievers över.
Me haat dao reste aod boewmateriaal voonde, mae oonderzeuk ter plaatsje is nog noeëts richtig gedoeë. Ènnige decenia gelaeje waor d'r Baerg 'n boeregemeensjap; noe is toerisme de belangriekste bron van inkomste.
't Buurtsjap haat ènnige fieng vakwaerkhoezer en me haat uvveraal 'n fie zich op de sjpoorwaegbrugk va S'n Maeëte.
De natuur
Dör g'ne Baerg sjteumt de Voor, al grillig meanderend. Ooch vindt me in g'ne Baerg 'n bron, mèt water dat mètstens dreekbaar is. 't Water wert regelmaotig oonderzeukt en bie de bron hèngt ummer 'n twieëtaleg sjrieve dat zaet of 't water waal of neet te dreenke is.
E g'ne Baerg haat 't 'n aantal visjvievers, oeë me op forelle kan vange. 't Water is aafgetapt van de Voor en keumt ooch wer oet in die baeëk. In de hoolwaeg roondom dit buurtsjap vindt me dasseburchte, die nog gebruukt waeëre.
