Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Hölsbergs, es te dit dialek sjpriks.

Arensgenhout ies 'n buurtsjap van Hölsberg in de gemeinte Baekdale in Zuud Limburg. De buurt weurt ouch waal kort D'n Hout geneump. 'ne Ouwere naam ies G'n Holt. De häöf en hoezer liegke tege de Ravesbösj aan. De bösj grens aan Sjtraobaek, Brokem, De Sjtoepert en groat Hazel. 't Kloaster Ravesjbösj bevingk ziech tösje deze bösj en 't gehuch. 't Medium Jomanda haet in de kapel van 't kloaster häör praktijk. In 2002 wone d'r 250 luuj.

Kleingenhout ies 'n buurtsje van Arensgenhout, dat weurt aangegeve door 'n wiet plaatsnaambord.

Gesjiedenis

In 1383 ies sjpraoke van 'ne Arnold, zoon van Francke Struver van Bung, dae G'n Holt es eigendóm haet. Holt of hout wies op 'n ope plek in eine bösj (Ravesbösj). Vanwege de naam Aren van Holt ies de plaatsnaam te verklaore.

Bezeenswaerdig

• 'n Aantal carrévörmige mergele häöf.
• Op de krusing Ravesbösjwaeg en Zitterderwaeg (de Sjtoepert) sjteit saer 1890 'n neo-gotisch kapelke, gewiejd aan Maria. In 1978 ies 't gebuuwke obbenuuts opgetrokke en miè nao achtere geplaats.
• Diverse waegkruzer op sjplitsinge.

Evenemente

In 'n weekend begin augustus vingk 'n Limburgs tentfiès plaats ónder de naam De tent sjteit.

Dörpsvereiniginge

• Fanfaar Sint Clemens oet 1934
• Buurtvereniging Arensgenhout, opgeriech in 1955 es veurtzètting van de jónkheid (1887).