An Revrond Dr William Borlase (2sa Hwevrer 1695 – 31ns Est 1772) o pronter hag antikwari Kernewek. Genys veu yn Penndin (pluw Lannyust) ha kavoes y adhyskans orth Pennsans, Aberplymm, ha Rysoghen. Y sakrys ev yn 1720 hag appoyntya pronter a Lusowan – y turya ev y'n soedh ma dre dhiw vlydhen war hanterkans. Yn 1732 y kavas ev prontereth Lannyust ynwedh.
Yn 1749 y skrifas Borlase erthygel a-dro dhe adamantys Kernow, ha rag henna yth eth ev ha bos esel a'n Kowethas Ryal. Y tellos ev Cornish Antiquities yn 1754, akont a-dro dhe Syllan yn 1756, ha Natural History of Cornwall yn 1758. Y ros ev dhe'n Gwithti Ashmolean, Rysoghen, niver a enyvales gyllys yn meyn ha traow erell. Borlase a aswonni niver a dus lettrys a'y dermyn, yn arbennik Alexander Pope.
Borlase a witha lies dornskrif gernewek a'y gowetha (John Boson, John Keigwin, Thomas Tonkin, h.e.), rag ensampel Nebbaz Gerriau dro tho Carnoack ha browsyon a The Duchesse of Cornwall's Progress gans John Boson. Y ferwis ev yn Lusowan.
Diyskynnyas dhodho, William Copeland Borlase, a dhellos y dhornskrifow yn-dann an hanow "A Collection of hitherto unpublished Proverbs and Rhymes in the ancient Cornish Language" yn 1866.
![]() |
Porth Kernow – Tre rag folennow ha klassys Wikipedya a-dro dhe Gernow. |