John Henry David Parker, aswonys ynwedh avel Yowann Parker, (10 Gortheren 1929 - 18 Meurth 2020) o dyskador ha awtour Kernewek. Genys veu yn Ilford, Essex yn 1929. Wosa gradhya yn erbysieth yn LSE, ev a spenas lies bledhen ow tyski awgrym ha Latin, ha wosa henna dos ha bos hwithrer skolyow. Hag oberi yn Kenya ev a dhyskas Swahili. Ev a skrifas a-dro dhe'y dermyn ena yn Kenya Interlude, dyllys yn 2015.
Ev a vetyas y wreg, Shirley (née Tinker) hag ev owth oberi yn Exmouth. Eseli ens i a Kowethas Operatek Karesk. Hi a leveris bos ganso an lev kana hwekka. I a dhemedhis yn 1977. Wosa remova dhe Gernow yn 1994, John Parker a dhallathas dyski Kernewek dre Kernewek Dre Lyther. Y dhyskadoryon o Ray Edwards ha Jori Ansell.
Wosa dos ha bos bardh yn 1998 gans an hanow bardhek Den Prasow, ev a dheuth ha bos dyskador Kernewek dre KDL. Yn 2002 ev a dhallathas klass yn Lannystli, ow tyski lies dysker a dheuth ha bos berdh a-wosa. An klass a dheuth has bos Klass an Hay.
Ev a skrifas lies lyver yn Sowsnek ha Kernewek. Ev o skrifer lies hwedhel berr yn Kernewek, usys yn klass dhe weres dyski. Kentrennys o dyskoryon dhe wari, ow talleth hengov a wariow mus, skrifys gans studhyoryon po studhyoryon kyns, kepar hag "Erghwynn ha’n Seyth Korr". Drefen bos an performyansow dres an Nadelik, dallethys veu keur dhe gana karolow, An keur na, Keur heb Hanow, a wra kana hwath. Ev a weresas Projekt an Bibel Kernewek gans treylya lyvrow Ruth hag Ecclesiastes.