Tradhisi Sesaji Réwanda ya iku upaya upacara ritual tradhisional kang dianakaké warga Kalurahan Kandri, Kacamatan Gunungpati, Kutha Semarang saben wulan syawal [1]. Ritual Sesaji Réwanda diwiwiti kanthi arak-arakan ngusung patang gunungan saka Kampung Kandri tumuju Guwa Kreo. Ing barisan paling ngarep ana wong papat kanthi paesan lan busana kethèk warna abang, putih, ireng, lan kuning. Barisan candhaké ya iku replika watang kayu jati kang jaréné dijupuk Sunan Kalijaga. Banjur barisan gunungan lan para penari.
Miturut tokoh masarakat Kandri kang uga keturunan juru kunci Guwa Kreo, Mbah Kasmani, ritual Sesaji Rewanda wis ana wiwit biyèn. Ancasé warga Kandri nglestarikaké tradhisi iki ya iku minangka wujud sukur marang Gusti Kang Maha Tunggal. Saliyané iku, ritual arak-arakan kanthi ngusung replika watang kayu jati minangka péranganing napak tilas Sunan Kalijaga nalika ing Guwa Kreo kang biyèné minangka kawasan alas jati. Sunan Kalijaga golèki watang kayu jati pilihan kanggo yasa Masjid Agung ing Demak. Ritual sesaji iki uga kanggo makani kethèk. Iki minangka wujud warga kanggo jaga keseimbangan alam lan kéwan ing kawasan Kreo.