BRICS eru samtök nokkurra nývaxtarlanda. Aðilar að samtökunum eru Brasilía, Rússland, Indland, Kína, Suður-Afríka (frá 2010), Egyptaland, Eþíópía, Íran, Sádi-Arabía og Sameinuðu arabísku furstadæmin (frá 2024). Heitið er skammstöfun mynduð úr fyrsta staf landaheita fimm fyrstu aðildarlandanna á ensku. Upphaflega voru fyrstu fjögur löndin flokkuð sem „BRIC“ (eða „BRICs“) áður en Suður Afríka bættist við árið 2010.[1] BRICS-löndin eru þekkt fyrir að hafa mikil áhrif hvert í sínum heimshluta; Þau eru öll aðilar að G20. Frá 2009 hafa BRICS-löndin hist árlega á formlegum leiðtogafundum.
Árið 2023 voru íbúar BRICS-landanna 3,67 milljarður, eða um 45% jarðarbúa.[2] Stofnríkin fjögur eru í hópi 10 fjölmennustu ríkja heimsins. Frá árinu 2018 höfðu aðildarríkin fimm samanlagða landsframleiðslu upp á 18,6 billjón bandaríkjadala að nafnvirði, eða um 23,2% af vergri heimsframleiðslu, og samanlagða landsframleiðsla (VSJ) upp á 40,55 billjón bandaríkjadala (32% af heimsframleiðslunni) og áætlaða 4,46 milljarða bandaríkjadala í samanlögðum gjaldeyrisforða. BRICS-samstarfið hefur fengið bæði lof og gagnrýni frá fjölmörgum álitsgjöfum.[3] Tvíhliða samskipti BRICS-þjóða eru aðallega á grundvelli afskiptaleysis, jafnræðis og gagnkvæms ávinnings.[4]