Árið 1602 (MDCII í rómverskum tölum) var ár sem hófst á þriðjudegi samkvæmt gregoríska tímatalinu en föstudegi samkvæmt júlíska tímatalinu sem er tíu dögum á eftir.

Atburðir

• 3. janúar - Umsátrinu um Kinsale lauk með ósigri Íra og spænskra bandamanna þeirra.
• 2. febrúar (Kyndilmessa) - Leikrit Shakespeares, Þrettándakvöld, var fyrst sýnt í sal lögmannafélagsins í Middle Temple í London.
• 20. mars - Hollenska Austur-Indíafélagið stofnað og veitt einkaleyfi til verslunar í nýlendum Hollendinga í Asíu.
• 20. apríl - Einokunarverslunin hófst á Íslandi með því að konungur veitti borgurum í Kaupmannahöfn, Málmey og Helsingjaeyri einkaleyfi til verslunar á Íslandi. Einokunin stóð til ársloka 1787.
• 15. maí - Bartolomew Gosnold uppgötvaði Þorskhöfða í Massachusetts í Nýja heiminum.

Ódagsettir atburðir

• Enevold Kruse tók við sem hirðstjóri á Íslandi af Jóhanni Bockholt.
• Færeyska lögþingið kvartaði við Kristján 4. undan yfirgangi enskra duggara á fiskimiðunum við Færeyjar.
• Karl hertogi endurreisti sænska ríkisráðið undir sinni stjórn.
• Bodleian-bókasafnið í Oxford var fyrst opnað almenningi.

Fædd

• 14. febrúar - Francesco Cavalli, ítalskt tónskáld (d. 1676).
• 1. maí - William Lilly, enskur stjörnuspekingur (d. 1681).
• 26. maí - Philippe de Champaigne, franskur listmálari (d. 1674).
• 14. júlí - Mazarin kardináli (d. 1661).

Dáin

• 22. mars - Agostino Carracci, ítalskur listmálari og prentmyndasmiður (f. 1557).
• Október - Thomas Morley, enskt tónskáld (f. 1557 eða 1558).

Opinberar aftökur

• Björn Þorleifsson, 47 ára gamall bóndi og „vandræðamaður“ frá Snæfellsnesi, hálshogginn á Alþingi „fyrir kvennamál, svall og „með mörgum sönnum líkindum“ þjófnað“.^[1] Hin fleygu orð „Höggðu betur, maður“ eru komin úr eftirfarandi frásögn Skarðsárannáls af aftöku Björns:

„Hann kvaddi menn með handabandi, áður sig niður lagði á höggstokkinn, og bauð svo öllum góða nótt. Var hann með öllu óbundinn. Jon böðull, er höggva skyldi, var þá orðinn gamall og slæmur og krassaði í höggunum, en Björn lá kyr á grúfu, og þá sex höggin voru komin, leit Björn við og mælti: Höggðu betur, maður! Lá hann svo grafkyr, en sá slæmi skálkur krassaði ein 30 högg, áður af fór höfuðið, og var það hryggilegt að sjá.“^[2]

Tilvísanir

1. ↑ Upplýsingar um aftökur sóttar á vef rannsóknarverkefnisins Dysjar hinna dauðu, þá ekki síst skrá á slóðinni https://dhd.hi.is/gogn/Info.pdf, sótt 15.2.20202.
2. ↑ Björn Jónsson, Annalar Þess froma og velvitra Sauluga Biørns Jonssonar á Skardsau Fordum Løgrettumanns í Hegranes-Sýslu, 1774. Ritið finnst á bækur.is. Frásögnin er skrásett með nútímaletri í: Alþingisbækur Íslands III. bindi, 1595-1605.