Hugenoti esis Franca protestanta grupo qua kreis la Reformita Eklezio di Francia. Li inpiresis en la texti da Jean Calvin, ed esis cirkume 10% de la habitantaro di Francia ante eventar la Masakro dil dio di Santa Bartolomeo, ye la 24ma di agosto 1572.
Pos la revoko en 1685 dil Edikto di Nantes di 1598, Hugenoti ne darfis praktikar sua religio, e multi fugis a Nederlando. Ye la 13ma di aprilo 1688 l'unesma grupo de Hugenoti arivis a Sudafrika de Europa, per la navo Voorschoten. Ca voyajo aranjesis da la Nederlandana Est-India-Kompanio (Vereenigde Oost-Indische Compagnie, o VOC). La VOC, havante interesi en multa loki en la mondo inkluzite sudal Afrika, volis trovar voluntanti por adjuntesar a la farmisti ye la Kabo di Bon Espero. De aprilo 1688 til januaro 1689, plura navi di la VOC portis Hugenoti a la Kabo. Tale cirkume 175 Hugenoti establisis su, kom parto di la oficala koloniizado di la VOC en ca regiono. Farmo-tereni donesis a li, dispersita inter la Nederlandana farmeyi.