Ti Natural Resources Conservation Service (NRCS), dati nga ammo a kas ti Soil Conservation Service (SCS), ket ti maysa nga ahensia iti Departamento ti Agrikultura ti Estados Unidos (USDA) a mangited iti teknikal a tulong kadagiti mannalon ken dagiti sabali pay nga agtagtagikua iti daga ken dagiti mangimatmaton.
Nabaliwan ti naganna idi 1994 idi las-ud ti presidensia ni Bill Clinton tapno maipaltiing iti nalawlawa a gandatna. Daytoy ket relatibo a bassit nga ahensia, agdama a buklen dagiti agarup a 12,000 nga empleado.[1] Ti gandatna ket ti mangpasayaat, mangsalaknib, ken mangkonserba kadagiti masna a rekurso kadagiti pribado a daga babaen ti kooperatibo a pannakiasmang iti estado ken dagiti lokal nga ahensia. Bayat a ti kangrunaan a pagtengngaan iti isipna ket dagiti daga iti talon, daytoy ket nakaaramid kadagiti adu a teknikal a kontribusion iti agrimensura iti daga, panangidasig ken panagpasayaat iti kalidad ti danum.[2][3] Ti maysa a pagarigan ket ti Conservation Effects Assessment Project (CEAP), a nabangon a mangidagup kadagiti pagimbagan kadagiti ganetget ti konserbasion a maipapan iti agrikultura a naital-o ken sinuportaran babaen dagiti programa iti Farm Security and Rural Investment Act of 2002 (2002 Farm Bill). Ti NRCS ket ti mangiyuna nga ahensia iti daytoy a proyekto.
Napundar ti ahensia gapu kadagiti ganetget ni Hugh Hammond Bennett, ti maysa a pionero ti konserbasion iti daga a nagtrabaho para iti Departamento ti Agrikultura manipud idi 1903 aginggana idi 1952.[4] Ti pammaregta ni Bennett ket naibatay iti pannakaammona kadagiti dakes nga apekto iti nurunor iti daga ken dagiti impaktona kadagiti daga ti Estados Unidos[5] a nakaiturongan ti Dust Bowl kadagiti taen idi 1930. Idi Septuembre 13, 1933, naporma ti Soil Erosion Service iti Departamento ti Interior, nga indauluan babaen ni Bennett. Naiyakar ti serbisio iti Departamento ti Agrikultura idi Marso 23, 1935, ken kalpasan iti nabiit a panawen, daytoy ket naitipon kadagiti sabali a yunit ti USDA tapno mabukel ti Soil Conservation Service babaen ti Soil Conservation and Domestic Allotment Act ti 1935.[6][7]
Mangimaton idi ti Soil Conservation Service kadagiti 500 a kampo ti Civilian Conservation Corps kadagiti baetan ti 1933 ken 1942. Ti kangrunaan a panggep dagitoy a kampo ket ti panagkontrol ti nurunor iti daga.[8]
Nagtultuloy a kas hepe ni Hugh Bennett, ti puesto a tinengngelna aginggana idi nagretiro idi 1952.[4] Idi Oktubre 20, 1994, nanaganan manen ti ahensia iti Natural Resources Conservation Service a kas parte ti Federal Crop Insurance Reform and Department of Agriculture Reorganization Act ti 1994.[7][9]