Angela Stachowa (rodź. Měrćinkec; * 16. awgusta 1948 w Praze, † 29. měrca 2022 w Lipsku) běše serbska spisowaćelka a politikarka.
Angela Stachowa bě dźowka serbskeho spisowaćela Jurja Měrćinka. Po maturje na Serbskej wyšej šuli w Budyšinje 1967 absolwowaše studij na Drježdźanskej Techniskej uniwersiće, kotryž 1972 jako diplomowa inženjerska ekonomka ze specializaciju elektrotechnika/elektronika zakónči. Wot 1973 do 1976 bě wona wědomostna sobudźěłaćerka na Karla Marxowej uniwersiće w Lipsku. Po tym dźěłaše jako swobodna spisowaćelka. Za swoje dźěła dósta wuměłstwowe myto Domowiny, wuměłstwowe myto města Lipska (1986) a myto za słuchohry OIRT, nimo toho złoćanu Johanna Gottfrieda Herderowu medalju. Jednotliwe twórby Stachoweje přełožichu so do čěšćiny, pólšćiny, rušćiny, šwedšćiny, chorwatšćiny a jendźelšćiny.
Angela Stachowa bě wot 1972 do 1989 čłonka strony SED. Wot 20. decembra 1990 hač do 10. nowembra 1994 bě wona jednu wólbnu periodu z čłonku Němskeho zwjazkoweho sejma. Wona bu jako njestronjanka za PDS přez saksku krajnu lisćinu do parlamenta wolena. W běhu legislaturneje periody wustupi 15. junija 1994 z frakcije PDS, wobchowa pak swój mandat jako bjezfrakciska zapósłanča.
Angela Stachowa bydleše w Lipsku.