Va Jool Kaesar (Ladjyn: Gaius Julius Caesar, ASE: [ˈɡaː.i.ʊs ˈjuː.lɪ.ʊs ˈkaj.sar]; J. Souree 100 RC — 15 Mayrnt 44 RC) ny ghineraal, ny pholitickeyr, ny chonsyl as ny screeudeyr Raueagh. Va paart mooar echey ayns ny taghyrtyn ren cur rish tuittym y Phobblaght Raueagh as irree Impiraght y Raue. 'Sy vlein 60 RC, ren Kaesar, Crassus as Pompei cur cochaarjys politickagh er bun va feer phooaroil as ren kioneyssaghey politickaght y Raue er feie shiartanse dy vleeantyn. Ren y lught ooasle cumaadagh jeh Shannad y Raue, Cato Aeg lesh pohlldey veih Cicero ny mast'oc, shassoo noi ny h-eiyrtyssyn v'ec y trooraght pooar y gheddyn liorish croutyn foayroil. Ren barriaght Chaesar er Goal, va creaghnit 'sy vlein 51 RC, sheeyney magh thalloo yn Raue gys y Vooir Eeaght as y Rhine. Haink er Kaesar dy ve ny chied ghineraal Raueagh ren goll tessen y daa ushtey shen tra ren eh croo droghad harrish y Rhine as tra ren eh cur stiagh er y Vretyn Vooar.
Ren ny cooilleenaghyn shen cur pooar cahnagh da as ren ad baggyrt er shassoo Pompei, as eh er ve aa-heughit rish y Çhannad lurg baase Crassus 'sy vlein 53 RC. Tra haink jerrey rish ny Caggaghyn Goalagh, ren y Shannad oardaghey Kaesar y kioneys cahnagh v'echey as çheet er ash gys y Raue. Yiooldee Kaesar, as hie eh tessen y Rubicon marrish leejoon, as eh faagail e wheiggey as goll stiagh 'sy Raue lesh armyn. Haghyr caggey theayagh er eiyrtys er shen, as dirree Kaesar magh myr reilleyder y Raue gyn coghrialtagh.
Lurg ren eh goaill stiurey er y reiltys, chur Kaesar claare lhiassaghyn sheshoil as reiltyssagh er bun, goaill stiagh doltey feaillere Yool. Ren eh laaraghey rheynneydys y Phobblaght as fy yerrey v'eh fogrit magh myr "jaghteyr son dy bragh". Ansherbee, cha row ny fo-streeuyn kiarit, as er Idus Mayrnt (15 Mayrnt) 44 RC, va Kaesar marrooit liorish possan dy hannadeyryn fo kioneys Marcus Junius Brutus. Vrish straih noa dy chaggaghyn theayagh magh as cha row reiltys bunraghtoil y Phobblaght currit er bun reesht. Dirree mac doltit Chaesar, Octavian (va goll er enney fo'n ennym Augustus ny s'anmey), myr eiraghtagh er e ayr. She toshiaght Impiraght y Raue v'ayn.
Gurneil eaghtyrys | |
---|---|
Eddyrashoonagh | |
Ashoonagh | |
Ard-scoillaryn | |
Ellyneyryn | |
Sleih | |
Elley |
![]() |
She bun ta'n art shoh. Cur rish, son foays y yannoo da Wikipedia. |