Romi
|
Ut'tor prodex rajeantolem povitr tirthosthan. Adlea kala saun povitr manil'lem kxetr, tirthoraz proyag mhollear hem olahabad. Dil'lichea udent- dokxinnek ut'tor relven dil'lichean 627 kimi. Ani modhyorelven mumboi saun 1360 kimi. Ontracher, gonga-yomuna nhoinchea songmacher, hem xar vosla. Loksonkhea 6,42,000 (1981).
Okboran hanga kil'lo bandlo ani hea xarak tea prantachem mukhel tthanne kelem. Ten'na saun prajagrajak hem namv poddlem. Valmiki ramainnasaun purannameren proyagache kitlexech ul'lekh mellttat. I. So. Tisrea xenkddeantolea, hangachea xilastombhacher , somratt oxokan kouxambichea razak dil'lo hukum' korantil'lo asa. Tache uprantchea lekhant panchvea xekddeantolea somratt somudroguptachea voibhvachem vornnon korantil'lem asa. Chini bhomvddekar fohian ani hyuentsong hamnni panchvea ani satvea xenkddeantolea aplea provasournnonant proyagacho ul'lekh kela. 1801 to hem xar brittixanchea xekatolla gelem. 1857 chea bonddant hangachea dexi fouzamni vantto ghetil'lo ani sumar so dis ho vatthar aplea tabeant douril'lo. Uprant brittixamni hem bondd moddun kaddlem.
Hangachea pornea xarantolim ghoram gochch asat. Toxench roste oxir asat. Punn varagonz chhaunni sarkea novea bhagachi ankhnni odyoyaut pod'dotin kelea. Raxttri-i rajmarg, relvemarg ani viman marganche prayagraj hem ek mhotvachem kendr. Hem xar ddak, tar, durdhvoni, hea somprk sadhnamni zoddil'lem asa. Hanga dhany, ums, kapus, oxa xetmalachi vhodd bazaropetth asa.Toxench sakor, komvchi, xabu, chamddem, vitto hanche karkhane, mudronnaloyam, prokaxon somstha, neayaloi, xaski-i karealoi, rugnnaloi adinchi kendram asat. Prayagrajochem videapitth, myur senttrol kolezantolo vigoneanovibhag, yuing khrixchon kolez, noini krixi somstha, gonganath zha somskrit sonxodhon mondir, proyag songit somiti, meyo memoriyol hol, olahabad songrohaloi, videapitth songrohaloi, rajy ani modhyourti gronthaloyam si. Vai chintamonni smarok gronthaloi ani bezhontt bharti bhoun oxo namnecheo somstha hea xarant asat. Te bhair bhardvaz axroma mukhar nehruchem anondobhoun, khuxrubagentleo mogol kobri, vostokulachea kouxambiche purvil'le ovxex oxeo itihasik vastuy olahabad xarant pollounk mellttat.
Hindi sahity ani somskritayechem mullpitth mantat. Toxench dhormik nodren hea xarak agllench mhotv ailam. Gonga yomuna ani sorsvoti hea tin nhomyacho trivenni songom' hanga dixtti poddtta.Hea trivenni songmacher dor vorsa maghmello bhorta ani dor bara bara vorsamni hanga kumbhmell bhorta. Trivennimadhou, somexvor, vasukixvor, bhordvajexvor xex, proyagovenni madhou, bhagirothi,sorsvoti, yomuna oxim zaitim tirthokxetram hea kxetrachea lagsar asat. Hanga axil'lea adlea kil'leachea tollghorant purvil'le okxoyouddache kandd ozun pollounk melltta. Hea zhaddachea tallyevelean mokxarthi nhoim uddi ghetale. Hem thambounk zohangiran hem zhadd toddun uddoilem oxem sangtat.