Iota é o nome da novena letra do alfabeto grego (ἰῶτα); equivale ao /i/ e ao /i:/. Minúscula ι, maiúscula Ι. Adoita transcribirse como i. Provén da letra do alfabeto fenicio yōd, que representaba unha semivogal soante prepalatal, son inexistente en grego, o que propiciou a adaptación do signo á vogal /i/. Como signo numérico representaba o dez. En maiúscula serve tamén para designar o noveno canto da Ilíada de Homero e en minúscula o noveno da Odisea.
En canto ao chamado iota subscrito ou mudo ver o apartado correspondente do artigo Diacríticos do alfabeto grego.