O dinar é a unidade monetaria de diversos estados do mundo, a maioría dos cales de lingua árabe[1] ou que antigamente formaran parte do Imperio Otomán, xa que historicamente foi usado en terras musulmás, desde tempos do Califato abasí de Bagdad.
A palabra "dinar" (دينار en árabe e en persa) ten a mesma orixe que o vocábulo diñeiro, xa que ambas as dúas derivan do denario (denarius) romano.
O dinar ten a súa orixe na antiga moeda sasánida e araboislámica de ouro que se empezou a cuñar a finais do século VII, e que tiña un peso que, segundo as épocas, oscilaba entre os 3,85 g e os 4,25. Nos seus inicios era unha imitación dos modelos bizantinos, pero pronto adquiriu carácter propio e definido, até o punto que foi imitado fóra dos territorios califais.