Hesian 2006ko udan sortutako musika talde sakandarra izan zen. Punk-rock eta hardcore melodikoen nahasketa bat ikusten da beraien abestietan, ska kutsu batekin. Ezaugarririk aipagarriena, nahasketa oso erakargarriak sortzen duten bi ahotsak ziren (emakume-mutil ahotsa).
2021eko urtarrilean taldeak desegitea erabaki zuen[1]
Ibilbidea
Hitzei dagokienez, gizarte eta politika aldarrikapenak, edota sentimendu ezberdinen adierazpenak dituzte hizpide. Beraien lehen diskoa, "Maite dugu", Iruñeko K estudiotan grabatu zen Alberto Porresen eskutik eta taldeak eta Albertok berak ekoiztu zuten. 2007ko ekainean argitaratu zen eta urte hartan bertan 1000 kopia baino gehiago saldu zituzten.
Aipagarria da 2008ko Gazte topaguneko abestia beraiek egin izana ere, "Zeru gorriko egunak". Horretaz gain, "Musikaz Sakana indartuz" diskoan "Maite dugu" abestia grabatu zuten eta "Euskal Herriak Autodeterminazioa" kanpainarako, izen berdina daraman abestia grabatu zuten.
Taldearen ekintza eremua oso zabala da eta urte eskas batean 50 kontzertu inguru eskaini zituzten Euskal Herriko eremu eta txoko guztietan, beti ere oso harrera onarekin, plazak edota gaztetxeak betez eta jendearen parte-hartze aktiboa lortuz eta bereganatuz. Berri Txarrak, Banda Bassotti, Habeas Corpus edota Su ta Gar taldeekin igo dira agertokira.
2008ko udan Aurtengo Gorakada 10 bilduman Hau dena aldatzera doa abestia sartu zuten, eta urrian bere estraineko lana kaleratuko zuen: Herriaren Oihua. Diskoak hamahiru abesti ditu eta lan hau ere Alberto Porresek grabatu zuen Iruñeko K Estudioetan. Euren estilo askotakoaren barnean punk azkarra, ska eta hardcore melodikoa atzeman daitezke, baita haize instrumentuen presentzia, melodia lirikoak eta mozketa gogorrak ere.
140 kontzertu inguru emanda, 2009ko neguan etenaldi bat egingo zutela iragarri zuten beren webgunean, hirugarren diskoa prestatzeko asmoz. Garai hartan, Erikek eta Ametsek taldea utzi zuten, eta haien ordez Donostiako Mireia (ahotsa) eta Iruñeko Xabi Larrainzar (gitarra) sartu ziren taldera.
2016an 10. urteurrena ospatzeko zazpigarren diskoa atera zuten, Hesian izenekoa eta 2018. urtean Hasiera diskoa plazaratu zuten.
2021. urtean taldearen amaiera iragarri zuten Bilbon urtarrilaren 9an azken kontzertua eman eta egun batzuetara[2].
_2.jpg)
