Euskal Irratiak Ipar Euskal Herrian herri-mugimenduetatik sortu diren euskarazko irratiak biltzen dituen elkartea da. Elkarren artean programak konpartitzeko eta guztiei dagozkien arazoei hobeto aurre egiteko sortu zen.

Kontaktatzeko helbidetzat Irulegiko irratikoa erabiltzen du, hots Donibane Garazikoa.

Kideak

Hasierako kideak herrialde bakoitzean azken urte luzeetan abian dauden irratiak izan ziren:

• Lapurdin Gure Irratia.
• Nafarroa Beherean Irulegiko irratia.
• Zuberoan Xiberoko Botza.

Beranduago Txingudi aldean (Gipuzkoa eta Lapurdin) sortu zen Antxeta irratia ere bildu zen.

Helburuak

Hauexek dira helburu nagusiak:

• euskara eta euskal kulturaren garapena bultzatzea, horretarako behar diren bitartekoak eskainiz.
• euskal irratien arteko ekoizpenaren antolaketa, koordinaketa eta hedapena ziurtatzea.
• irrati elkarteen ordezkaritza eta defentsa antolatzea administrazioen aurrean.
• egoera ekonomikoaz arduratu eta diru-baliabideak hobeto kudeatzen laguntzea.

Elkarlana

Aipatu lau irratiak Euskal Herri osoko irratiak biltzen dituen Arrosa^[1] sareko kideak dira.

Ipar Euskal Herri mailan bilgune hau Euskal Konfederazioa eta EKE Euskal Kultur Erakundea elkarteen partaide da eta oro har eremu geografiko honetako euskalgintzarekin zerikusia duten dinamika guztietara lotzen da.

Ikus, gainera

• Antxeta irratia
• Gure Irratia
• Irulegiko irratia
• Xiberoko Botza
• Euskarazko irrati kateak
• Gaztea
• Eitb
• Naroa Gorostiaga

Erreferentziak

Kanpo estekak

• EKEren webgunea Euskal Irratiak bilguneaz.