Mauritshuis (nederlandeg a dalvez Ti Maoris) a zo ur mirdi gouestlet d'an arzoù, lec'hiet e Den Haag en Izelvroioù. Savet eo bet ar savadur etre 1636 ha 1641. Bet eo ti Johan Maurits van Nassau-Siegen. Ennañ e kaver oberennoù gant Johannes Vermeer, Rembrandt van Rijn, Jan Steen, Paulus Potter, Frans Hals ha gant Hans Holbein yaouank. En holl e kaver tost 800 oberenn ennañ.
Goude marv ar priñs Johan Maurits e 1679 e voe perc'hennet ar savadur gant ar familh Maes, hag a feurmas ar savadur da c'houarnamant an Izelvroioù. Al lod brasañ eus ar savadur a voe distrujet abalamour d'un tan-gwall e 1704. Kempennet e voe neuze ar savadur etre 1708 ha 1718[1] E 1820 e voe prenet Mauritshuis gant gouarnamant an Izelvroioù, gant ar pal staliañ ennañ dastumad livadurioù ar roue.[2].
Digoret e voe d'an dud e 1822[3]. Ur mirdi stad e voe betek ma vefe lakaet da brevez e 1995. Un diazezadur a ra war-dro an oberennoù, padal ez eo bepred perc'henn ar Stad war ar savadur.