Ar gwagr, pe gwagrennoù, zo organoù e korf lod loened ha hini mab-den eo o roll kenderc'hañ bouedennoù, en o zouez an hormonoù, al laezh, an halv, ar c'hwez, ar sper, an daeroù.<b Daou zoare gwagrennoù zo :

• ar gwagrennoù-enborc'hañ a gas an hormonoù a-nebeudoù er gwad ;
• ar gwagrennoù-ezvorc'hañ a gas ar bouedennoù all e diabarzh kleuzennoù ar c'horf pe war ar gorre anezhañ.

Gwagrennoù enborc'hiañ

• Ar c'hougorfenn, a zo dindan an empenn.
• Ar c'hourjadenn, a zo en empenn.
• Ar gouzerc'hvel, a zo en empenn ivez.
• Ar gwagrennoù us-lounezh, a zo war al lounezhi.
• Ar wagrenn skoed, a zo er gouzoug.
• An toazon, a zo e kavenn ar brusk, etre an div skeventenn.

Gwagrennoù ezvorc'hañ

• Ar gwagrennoù c'hwezpar a zo er c'hroc'hen a genderc'h ar c'hwez.
• Ar gwagrennoù soav zo stag ouzh pep blevenn ar c'horf ; soav a genderc'hont evit mirout ouzh ar c'hroc'hen a zisec'hañ.
• Ar gwagrennoù halv, a zo er genoù da genderc'hañ an halv.
• Gwagrennoù an daeroù e pep lagad evit o leizhañ.
• Gwagrennoù Brünner, a zo er benvegad koazhañ, en daouzegenn, evit aesaat ar c'hoazhañ.
• Gwagrennoù ar bronnoù, a ro laezh.
• Gwagrennoù Cowper, a zo e-kichen kan-troazh ar baotred evit lenkraat diabarzh ar c'halc'h kent strinkadur ar sper.
• Ar raksavenn, a zo un tamm eus ardivink-genel ar baotred ; kenderc'hañ a reont ul lodenn eus ar sper.
• Ar c'hellennoù sper, a zo a-dreñv raksavenn ar baotred ; kenderc'hañ a reont un dourenn karget a fruktoz evit bouta ar spergelligoù.
• Gwagrennoù Bartholin, a zo e kourzh ar maouezed evit lenkraat o gouhin.
• Gwagrennoù Skene, a zo a-hed kan-troazh ar maouezed ; p'he devez ar vaouez un oriadell e strink an dourenn a genderc'hont, en hevelep doare ha plijadur ar baotred. Par da raksavenn ar baotred eo gwagrennoù Skene e korf ar maouezed.