Diellevr abati Redon zo un dastumad kartaoù a ya eus fin an VIIIvet kantved betek an XIIvet kantved hag a zo a-bouez-bras evit Istor Breizh. Miret eo diellevr Redon e Diellaoueg istorel eskopti Roazhon hag adembannet eo bet div wezh, e 1863 hag e 1998-2004 (sellet ouzh al levrlennadur).
Kavout a reer el levr-se eilennoù gwiriet eus titloù perc'henniezh Abati Sant-Salver Redon war he font. Diazezet e oa bet ar manati e Redon (e departamant Il-ha-Gwilun hiziv) e 832 gant Konwoion dindan gwarez Nevenoe, Roue Breizh. Kroget e oad gant ar gwiriekadur en eil hanterenn an XIvet kantved, dindan an abad Aumod (1062-†1083)[1],[2]. Daou eus an eilskriverien o deus skrivet o anv : Judikael ha Gwegon[3].
En diellevr ez eus 391 akta e latin, war 147 parchenn, dezhe 375 mm uhelder ha 275 led[4]. Skrivet eo an anvioù e henvrezhoneg, re an testoù niverus a gaver e traoñ pep akta peurgetket.
Tennañ a ra ar c'hartaoù d'an domanioù pe d'an douaroù un tamm e pep lec'h e Breizh. Un niver bras anezhe a denn da vadoù a zo bodet e traoñienn ar Gwilun, e reter ar Morbihan a hiziv hag e kornôg al Liger-Atlantel a vremañ.
An teul-mañ zo ur vammenn a ditouroù a-bouez-bras evit anavezout istor Breizh er Grennamzer, er Grennamzer uhelañ peurgetket, hag ivez he zoponimiezh hag an anvioù-familh eus ar vro. Ar meneger savet gant ar yezhoniour Bernard Tanguy a vod 2100 anv den hag 800 anv-lec'h, hep kontañ an adstummoù[2].
Un teul all a vez anvet a-wezhioù "Diellevr bihan Redon". N'eus ennañ nemet teir follenn diwar ar 14 a oa c'hoazh e 1840. Dastumet e oa bet en eil hanterenn an XIIvet kantved. Miret zo unan eus ar follennoù e maerdi Redon, hag an div all e Levraoueg Vroadel Bro-C'hall[8].