La llanza[1] o llancia[2] ye un arma compuesta d'un asta (palu-vara de madera o metal) que nel cabu tien fixa una fueya afilada o puntiada. Foi una de les armes primeres del home na prehistoria, y demientres tolos milenios de la Historia acompañó a los guerreros de toles dómines y fasteres.
D'elles dicíen grandes guerreros y militares que "yeren l'arma reina de les batalles", penriba de toles demás, pues dau'l so baxu coste de fabricación, la so facilidá d'usu a pie o a caballu, el so algame (dalgunes podíen arrefundise) y la potencia d'espetu o golpada, por mor del llargu "brazu mecánicu" que ye un asta, facíenla un arma perbona.
Antiguos tipos de llanza
Alabarda: Mangada con un "petu" (pinchu o púa) na parte cimera de la "cabeza d'armes", con una fueya en forma o variantes d'un hachu nun estremu tresversal, y nel so llau opuestu otru pequeñu "petu" o filu afiláu y estrechu.
Azagaya: Arma llanzable llixera de la época paleolítica cola punta fecha con un cachu aguzáu d'asta de cérvidu.
Bidente: Mangada con una cuchiella en forma de media lluna.
Bisarma: (Del fr. Guisarme), llanza de punta mesta compuesta por una parte cortante y otra puntiada.
Bisentu: Llanza xaponesa que correspuende a la china kwan-do, l'antecesora de la Naginata.
Chuzu: Llanza curtia de punta arredondiada y estrecha.
Corcesca: Llanza variante de la partesana con aletes en forma de farpón.
Cuchiellu de brecha: Forma más primitiva de fueya mangada d'un solu filu y estrechu.
Dardu: Nómense asina les llances curties llanzables como xavalines.
Espontón: Arma mangada de la familia de les partesanes de la oficialidá de los sieglos XVI y XVII.