E Dransformer (vo lat. transformare ‚umforme, umwandle‘; au churz Drafo) isch e Bauelimänt oder en Aalaag in dr Elektrotechnik.
E Dransformer bestoot us eme magnetische Kräis – mäistens eme Ferrit- oder Iisechärn – wo d Läiter vo mindestens zwäi verschiidene Stroomkräis eso drumumegwigglet sin, ass dr Stroom vo jedem Stromkräis meemol um e Kärn umegfüert wird. Läit mä an äini vo dene Wigglige, wo au as Dransformer-Spuele bezäichnet wärde, e Wäggselspannig draa, so entstoot an dr zwäite Wigglig (und alle andere, wenn s no mee het) e Wäggselspannig, wo d Gröössi von ere sich (im Leerlauffall) zu dr Spannig, wo an dr erste Spuele agläit worde isch eso verhaltet wie s Verheltnis vo de Windigszaale vo de entsprächende Wigglige zuenander.
Dransformer wärde vor allem iigsetzt, zum Wäggselspannige gröösser oder chliiner z mache. Usserdäm wärde d Stroomkräis usser bim Spaardransformer galwanisch drennt. D Stroomversorgig isch ooni Dransformer zur Zit ummööglig, wil elektrischi Energii nume mit Hoochspannigsläitige wirtschaftlich sinnvoll über groossi Distanze cha dransbortiert wärde; zum Betriibe vo Elektrogräat isch s aber sicherer und bekweemer, wemm mä Niider- und Chläispannige brucht. Netzdransformer befinde sich in fast alle elektronische Gräät, denn in fast alle isch d Betriibsspannig andersch as d Netzspannig. In dr Signalverarbäitig und dr Doontechnik setzt mä spezielli Dransformer ii, wo nit uf e möögligst verlustarmi Läistigsüberdräägig optimiert sin, sondern d Signaal über e gröössere Arbetsfrekwänzberiich möögligst unveränderet und ungstöört witergääbe.
Wikibooks: Transformator — Lern- und Lehrmaterialie
![]() |
Dä Artikel basiert uff ere fräie Übersetzig vum Artikel „Transformator“ vu de dütsche Wikipedia. E Liste vu de Autore un Versione isch do z finde. |