Qín Shǐhuángdì (秦始皇帝) | |
---|---|
Familienaame: | Yíng (嬴) |
Vornaame: | Zhèng (政) |
Regierigszit: | 247 v. d. Z. bis 10. Septämber 210 v. d. Z. |
Dr Qín Shǐhuángdì (chin. 秦始皇帝 „Erste erhaabene Gottkaiser vo Qin“, äigentlig Yíng Zhèng (chin. 嬴政); * 259 v. Chr. z Handan; † 10. Septämber 210 v. Chr. z Shaqiu) isch dr Gründer vo dr chinesische Qin-Dünastii gsi und vom chinesische Kaiserriich.
Dr Yíng Zhèng isch in dr Zit vo de Stritende Riich uf d Wält cho, wo siibe Staate um d Vorheerschaft in China kämpft häi. Si Häimetland Qin isch nit nume äins vo de riichste chinesische Riich gsi, sondern scho sit 288 v. d. Z. au s grösste. Usserdäm het s scho e Generazioon vor em Yíng die effiziäntisti innerstaatligi Organisazioon ghaa. S Qin-Riich sig vo de Überleegige vom Legalismus brägt gsi, wo s Kollektiv über dr Äinzeln gstellt het für zum d Macht z waare Beloonig und Stroofe iigsetzt het. Nochdäm si Vater scho früe gstorbe isch, isch dr Yíng Zhèng scho im Alter vo dritääni Köönig worde. Vo 230 v. d. Z. aa het er in meerere Fäldzüg alli verfindete Staate underworfe und China gäinigt, und sich sälber under em Naame Qín Shǐhuángdì zum Kaiser erhoobe. Zämme mit sim Kanzler Li Si, wo dr Legalismus ooni Vorbehalt befürwortet het, het er e Beamtestaat ufbaut und eso sis Riich vollstanändig chönne kontrolliere. Er het e Hufe Reforme und Normeregulierige iigfüert, het sich aber uf Zwangsarbet und e rücksichtslosi Gwaltheerschaft gstützt, was Millione vo sine Underdaane s Lääbe kostet het. Wäge däm isch sis Aasee in dr modärne Volksrepublik China seer umstritte.
Es het e Hufe Spiilfilm, Romään, Theaterstück und äänligs gee, wo dr Qín Shǐhuángdì zum Thema häi, und dorum isch er dr färnöstlig Heerscher, wo in de westlige Kulturkräis am bekanntiste isch. Au d Entdeckig vo dr Terrakottaarmee vor sim sim Mausoleum het drzue biidräit.
Vorgänger | Amt | Nochfolger |
Zhuangxiang | König vo Qin 247–210 v. Chr. |
Qin Er Shi |
— | Kaiser vo China 221–210 v. Chr. |
![]() |
Dä Artikel basiert uff ere fräie Übersetzig vum Artikel „Qin_Shihuangdi“ vu de dütsche Wikipedia. E Liste vu de Autore un Versione isch do z finde. |