Dr Begriff Ortsgmaind stoot för e bestimmti Form von ere Gmaind. Me kännt en z Dütschland im Bundesland Rhiland-Pfalz, z Öschtriich und i de Schwiz. Er werd aber öberall e chli andersch bruucht.
I de Schwiz chann de Begriff je noch Kanton a anderi Bedütig ha:
Im Kanton Thurgau sind d Ortsgmainde näbed de Munizipalgmainde bis Mitti vo de 1990er Joor sälbschtändegi Körperschafte gsi. Sit em Abschluss vo de Gmaindsreform sinds jetzt en Tail von ere politische Gmaind.[1]
Im Kanton Sanggale händ d Ortsgmainde innerhalb von ere politische Gmaind e gwüssi Sälbschtändigkait. Je noch Ort haisseds Ortsgmaind, Burgergmaind, Korporazion oder au Rood. Es git en kantonale Verband vo de Ortsgmainde, wo as Ziil hät, d Autonomii vo de Ortsgmainde z erhalte und z schtärche.[2]
Im Kanton Glarus sind di politische Gmainde bis Endi 2010 als „Ortsgmainde“ bezaichnet worde.