Dr Octavio Paz Lozano 31. Merz 1914 z Mixcoac, hite Mexiko-Stadt; † 20. April 1998 z Mexiko-Stadt) isch e mexikanische Schriftsteller un Diplomat gsii. Är het anne 1990 dr Nobelbryys fir Literatur iberchuu.
(*Dr Paz isch uf d Wält chuu as Suhn vum Octavio Paz Solórzano un dr Josefina Lozano. Sy Vater isch en active Unterstitzer vu dr Revolution gege s Reschiim vum Porfirio Díaz gsii. Dr Octavio Paz isch im Dorf Mixcoac ufgwachse, wu hite zue Mexiko-Stadt ghert.
Dr Paz het Jura un Philosophy studiert, zerscht z Mexiko, speter as Guggenheim-Stipendiat z San Francisco un z New York. Anne 1937 het er s Studium abbroche un het e Sekundarschuel fir indianischi Arbaiter- un Buurechinder uf dr mexikanische Halbinsle Yucatán grindet.
Anne 1945 isch dr Paz in dr diplomatisch Dienscht vu Mexiko yydrätte. Bis 1962 het er z Frankrych gschafft, unter anderem zämme mit em Pablo Neruda. In däre Zyt isch dr Essay El laberinto de la soledad (dt. Das Labyrinth der Einsamkeit) entstande, ne Erforschig vu dr mexikanischen un latynamerikanische Identitet. E surrealistische Yyfluss uf sy Wärch het sich gee dur d Zämmenarbet mit em André Breton un em Benjamin Péret. Im Spanische Burgerchrieg het d Paz kämpft uf dr Syte vu dr Republikaner.
Anne 1962 isch dr Paz mexikanische Botschafter z Indie wore. Im Johr 1968 het di diplomatisch Laufbahn niderglait us Protescht gege s Massaker an Studänte uf dr Plaza de Tlatelolco z Mexiko-Stadt. Im Johr 1971 isch er uf Mexiko zrugggange, wun er derno bis zue sym Dod gläbt het.
Zue syne wichtigschte lyrische Wärch zelle Piedra de sol (dt. Sonnenstein) us dr 50er Johr, e Wärch wu in syre Wirkig uf di latynamrikanisch Literatur vergliche wird mit dr Wirkig vu s T. S. Eliots The waste land uf di änglischsprochig Literatur, Blanco (Weiß) us dr 60er Johr un Pasado en claro (Von der Kladde zur Klarheit) us dr 70er Johr. Die drei Wärch sin unter em Titel Die großen Gedichte au uf Dytsch uusechuu.