E Naturkatastroofe isch e Veränderig vo dr Ärdooberflechi oder dr Atmosfääre, wo uf natürligi Wiis entstande isch und wo uf Lääbewääse und bsundrigs uf Mensche und iiri Lääbeswiis verheerendi Uswirkige het.
Im Raame vom Katastroofeschutz wärde Maassnaame ergriffe, zum Naturkatastroofe abzweere.
E spektakulärs Natureräignis (zum Bischbil wenn e Gletscher uf Grönland abbricht) längt nit für dass mä von ere Naturkatastroofe cha reede; im ängere Sinn cha e Natureräignis nume denn zur Katastroofe wärde, wenn s uf Mensche und iiri Lääbeswiis und modärni, kulturelli Gwoonhäite e Wirkig het. Wenn hingege Mensche e Katastroofe in dr Natur verursache, redet mä von ere Umwältkatastroofe. Au Süüche (Epidemie) und Unziiferblooge zelt mä normalerwiis nit drzue, aber anderi Schädlingsblooge, wo sich brimär uf s Wirtschaftslääbe, und erst as e Konsekwänz doodrvo uf d Gsundhäit uswirke, scho.
D Zit, wo sonigi Veränderige stattfinde, goot vo Sekunde (Ärdbeebe) bis zu Joorzäänt (Dürrene, Klimaschwankige). D Gröössi vo dr Wirkig uf d Mensche isch d Basis vom Begriff vo dr Katastroofe. Si cha iigschezt wärde as d Zaal vo de Katastroofeopfer, as volkswirtschaftlige Schaade, aber au as Versicherigsschaade.
Zu de Naturkatastroofe in Öiropa in de letschte hundert Joor zele lbbe e Dotzed Eräigniss. Vo dene si d Hitzwälle im Joor 2003 mit 70'000 Doodesopfer und s Elbhoochwasser im Joor 2002 mit Schääde in ere Hööchi vo öbbe 18 Mrd. € die verheerendste gsi. Uf dr ganze Wält si in däm Zitruum hunderti vo sonige Eräigniss bassiert. As die wo am mäiste Schaade aagstellt häi zele s Ärdbeebe vo Kobe 1995 und dr Hurrikan Katrina 2005 mit bis zu 100 Mrd. US-$ volkswirtschaftligem Schaade. Zu de Naturkatastroofe in dr Gschicht wo am mäiste Lüt umbrocht häi, ghööre d Dürrene z Indie 1965 bis 1967 mit öbbe 1,5 Mio. Doote, und d Überschwemmige z Indie im Joor 1955 mit 45 Mio. Obdachlose. Über früeneri Eräigniss wäiss mä zweenig für zum sä chönne iischetze.
![]() |
Dä Artikel basiert uff ere fräie Übersetzig vum Artikel „Naturkatastrophe“ vu de dütsche Wikipedia. E Liste vu de Autore un Versione isch do z finde. |